पतीचा मृतदेह लपवण्यासाठी घेतली भाड्याने खोली; खरं कारण समजल्यावर पोलीसही हैराण

साकीनाका येथील यादवनगरमध्ये नसीम शेख आणि रुबिना शेख हे पती-पत्नी वास्तव्यास होते. त्यांच्या घरापासून जवळच असलेल्या एका खोलीमधून दुर्गंधी येत असल्याने येथील रहिवाशांनी पोलिसांकडे तक्रार केली. पोलिसांनी कुलूप तोडून घर उघडले असता कपाटामध्ये कुजलेल्या स्थितीतील मृतदेह आढळला. आजुबाजूच्या रहिवाशांनी हा मृतदेह नसीम शेख याचाच असल्याचे सांगितले. ओळख पटल्यावर पोलिसांनी हत्येचा गुन्हा दाखल करून तपास सुरू केला. वरिष्ठ पोलिस निरीक्षक बळवंत देशमुख यांच्या मार्गदर्शनाखाली सहाय्य़क निरीक्षक धीरज गवारे, अर्जुन कुदळे, वाल्मिक कोरे यांच्यासह लोणकर, चव्हाण, बनसोडे यांची पथके तयार करण्यात आली. तपासदरम्यान नसीम यांची पत्नी गायब असल्याचे समजले. अखेर पोलिसांनी रुबिना हिला शोधून काढले.

संधी मिळाली नाही…

नसीम घरी एकटाच असताना मित्र सैफ फारुकी याच्या मदतीने गळा दाबून मारल्याचे तिने सांगितले. पोलिसांनी सैफ यालाही अटक केली. नसीम चारित्र्यावर संशय घेऊन शारीरिक आणि मानसिक छळ करीत असल्याने त्याची हत्या केल्याचे रुबिना हिने सांगितले. दोघांनी नसीमचा मृतदेह लपविण्यासाठी खोली भाड्याने घेतली. तेथूनही मृतदेहाची विल्हेवाट लावायची होती; मात्र ती संधी मिळाली नाही आणि दुर्गंधी सुटल्याने प्रकरण उजेडात आले.