Rain Update : पावसाचे धुमशान… रायगड, रत्नागिरी आणि सिंधुदुर्गातही शुक्रवारी रेड अलर्ट , कोल्हापूरलाही इशारा

प्रादेशिक हवामान विभागाने दिलेल्या माहितीनुसार कुलाबा येथे दिवसभरात ३३.२ तर सांताक्रूझ येथे १३.२ मिलीमीटर पावसाची नोंद झाली. कुलाबा येथे बुधवारी सकाळी ८.३० ते गुरुवारी सकाळी ८.३० या वेळेत ११०.६ तर सांताक्रूझ येथे १२५ मिलीमीटर पावसाची नोंद झाली. रात्रभर पडलेल्या पावसाने पुन्हा एकदा मुंबईच्या पावसाची आकडेवारी वाढली असून, सांताक्रूझ येथे १०५१ मिलीमीटर तर कुलाबा येथे ९५३ मिलीमीटर एकूण पाऊस या मोसमामध्ये नोंदला गेला आहे. गुरुवारी दिवसभरात कुलाबा पम्पिंग स्टेशन, कुलाब्याचे प्रादेशिक हवामान केंद्र, दहिसर, सायन अशा तुरळक ठिकाणी पावसाने जोरदार उपस्थित लावली. नवी मुंबईतही तुरळक ठिकाणी पाऊस जोरदार पडला. गुरुवारी विठ्ठल वाडी, पनवेल, जुईनगर, खैरणे येथे पावसाचा वेग थोडा अधिक होता. इतर ठिकाणी मात्र पावसाचा वेग फारसा नव्हता. बुधवारीही दिवसभर फारसा पाऊस पडला नसला तरी रात्री कल्याण, डोंबिवली, ठाणे येथे काही ठिकाणी १२० मिलीमीटरहून अधिक पाऊस पडला. त्यामुळे बेलापूर, घणसोली, पनवेल, जुईनगर, कौसा, मुंब्रा, नेरुळ, सानपाडा येथे १४० मिलीमीटरच्या आसपास गुरुवारी सकाळी नोंद झाली.

मुंबईला रेड अॅलर्ट

सिंधुदुर्गापासून पालघरपर्यंत तसेच पुणे, कोल्हापूर, सातारा येथील घाट परिसरामध्ये येत्या पाच दिवसांमध्ये परिस्थिती अशीच असेल, अशी माहिती प्रादेशिक हवामान विभागाचे प्रमुख डॉ. जयंत सरकार यांनी दिली. शुक्रवारी पालघर, ठाण्यासह मुंबईलाही रेड अॅलर्ट देण्यात आला आहे. या काळात तुरळक ठिकाणी अती तीव्र मुससळधार पावसाचा अंदाज आहे. रायगड, रत्नागिरी आणि सिंधुदुर्गातही शुक्रवारी रेड अलर्ट आहे. पुणे, कोल्हापूर, साताऱ्याच्या घाट भागात तुरळक ठिकाणी अतितीव्र मुसळधार पाऊस पडू शकेल.