आकुर्डीच्या डॉ. डी. वाय. पाटील औषधनिर्माणशास्त्र महाविद्यालयाच्या ‘बी. फार्मसी’ अभ्यासक्रमाला एनबीएचे पुनःमानांकन
पुणे : आकुर्डी येथील डॉ. डी. वाय. पाटील औषधनिर्माणशास्त्र महाविद्यालयाने आपल्या शिरपेचात मानाचा तुरा रोवला आहे. महाविद्यालयाच्या बी. फार्मसी अभ्यासक्रमाला ‘नॅशनल बोर्ड ऑफ ऍक्रेडिटेशन’ (NBA) कडून पुन्हा एकदा पुढील तीन वर्षांसाठी मानांकन प्राप्त झाले आहे. या यशामुळे दर्जेदार आणि गुणवत्तापूर्ण शिक्षण देण्याबाबतची महाविद्यालयाची बांधिलकी पुन्हा एकदा सिद्ध झाली आहे.
सखोल मूल्यमापनानंतर मानांकन
एनबीएच्या वतीने करण्यात आलेल्या या प्रक्रियेत महाविद्यालयाच्या सर्वांगीण प्रगतीचा आढावा घेण्यात आला. यामध्ये प्रामुख्याने महाविद्यालयाचा दृष्टिकोन, शैक्षणिक ध्येयधोरणे, अध्यापन-अध्ययन प्रक्रिया आणि विद्यार्थ्यांच्या सर्वांगीण विकासावर भर देण्यात आला. तसेच, तज्ज्ञ प्राध्यापक वर्ग, आधुनिक पायाभूत सुविधा, प्रभावी प्रशासन आणि आर्थिक संसाधनांचे योग्य व्यवस्थापन या निकषांवर महाविद्यालयाचे सखोल मूल्यमापन करण्यात आले.
हेही वाचा – पुणे-मुंबई एक्सप्रेसवेवर धावत्या कंटेनरला भीषण आग, चालकाच्या सतर्कतेमुळे टळला अनर्थ…
सांघिक प्रयत्नांचे फळ: डॉ. निरज व्यवहारे
“महाविद्यालयाचे सर्व अंतर्गत व बाह्य घटक, कर्मचारी आणि विद्यार्थी यांच्या सक्रिय सहकार्यामुळेच हे यश मिळाले आहे,” असे मत प्राचार्य डॉ. निरज व्यवहारे यांनी व्यक्त केले.
मान्यवरांकडून कौतुक
या यशाबद्दल संस्थेचे अध्यक्ष श्री. सतेज पाटील, विश्वस्त श्री. तेजस पाटील आणि संकुल संचालक रियर अॅडमिरल अमित विक्रम (नि.) यांनी महाविद्यालयातील सर्व कर्मचाऱ्यांचे अभिनंदन केले.
श्री. सतेज पाटील: ” हे मानांकन विद्यार्थी केंद्रित शिक्षणासाठी आणि भविष्यातील वाटचालीसाठी प्रेरणादायी ठरेल.”
श्री. तेजस पाटील: “अभिनंदनासोबतच, ज्या निकषांवर कामगिरी अजून उंचावता येईल, त्यासाठी सातत्याने प्रयत्न सुरू ठेवावेत.”
श्री. अमित विक्रम: “महाविद्यालयाने केलेल्या सांघिक प्रयत्नांचे हे फलित आहे.”
या यशामुळे शैक्षणिक क्षेत्रात महाविद्यालयाचा नावलौकिक अधिक वाढला असून विद्यार्थ्यांमधूनही आनंदाचे वातावरण व्यक्त होत आहे.
महाईन्यूज-X वर फॉलो करा : महाईन्यूजला instagram वर फॉलो करा
”आमच्या औषधनिर्माणशास्त्र महाविद्यालयाला मिळालेले ‘एनबीए’चे पुनःमानांकन हे आमच्या गुणवत्तेवर बसलेली अधिकृत मोहोर आहे. आम्ही केवळ पदव्या देणारे केंद्र नसून, जागतिक दर्जाचे ‘फार्मसी’ तज्ज्ञ घडवणारी संस्था आहोत, याची ही प्रचिती आहे.
विद्यार्थी हाच आमच्या सर्व धोरणांचा केंद्रबिंदू राहिला आहे. आधुनिक प्रयोगशाळा, अनुभवी प्राध्यापक आणि संशोधनाला पोषक वातावरण यामुळेच हे यश शक्य झाले. हे यश महाविद्यालयाचे प्राचार्य, सर्व शिक्षक आणि शिक्षकेतर कर्मचाऱ्यांच्या सांघिक कष्टाचे फळ आहे. हे मानांकन आम्हाला भविष्यात अधिक जोमाने शैक्षणिक नवनवीन उपक्रम राबवण्यासाठी आणि विद्यार्थ्यांना प्रगत शिक्षण देण्यासाठी नक्कीच प्रेरणा देणारे ठरेल.”– सतेज पाटील (अध्यक्ष, डॉ. डी. वाय. पाटील संकुल, आकुर्डी)
