श्री उमांगमलज जन्मोत्सवात श्रीमंत दगडूशेठ हलवाई गणपतीला ११०० श्रीफळांचा महानैवेद्य
पुणे | श्रीमंत दगडूशेठ हलवाई सार्वजनिक गणपती ट्रस्टच्या वतीने शनिवारी श्री उमांगमलज जन्मोत्सव सोहळा मोठ्या भक्तिभावात साजरा करण्यात आला. या निमित्ताने श्री गणरायाला ११०० श्रीफळांचा महानैवेद्य अर्पण करण्यात आला. गाणपत्य संप्रदायानुसार कार्तिक शुद्ध चतुर्थीला म्हणजेच श्री उमांगमलज जन्मोत्सव दिनी मोरयाला श्रीफळ अर्पण करण्याला विशेष धार्मिक महत्त्व आहे.
या सोहळ्यानिमित्त मंदिरात आकर्षक श्रीफळांची आरास आणि विविध धार्मिक विधी पार पडले. पहाटे तीन वाजता ब्रह्मणस्पती सूक्त पठणाने कार्यक्रमाची सुरुवात झाली. त्यानंतर सकाळी चार वाजता गायिका शेफाली कुलकर्णी – साकुरीकर यांच्या सुरेल गायनाने वातावरण भक्तिमय झाले. सकाळी आठ वाजता गणेश यागाचे आयोजन करण्यात आले.
हेही वाचा : ‘तिने भावाला प्रपोज केलेलं..’; आरोपीच्या बहिणीची माहिती, फलटण डॉक्टर प्रकरणाला नवं वळण
ट्रस्टचे अध्यक्ष सुनील रासने म्हणाले, ‘देवी पार्वतीने अंगावरच्या मळापासून एक पुतळा बनवला. त्याला जिवंत केले. पुढे त्याचे आणि शंकरांचे युद्ध झाले. भगवान शंकरांनी त्या मुलाचे मस्तक उडविले. देवी पार्वतीच्या संतापाला शांत करण्यासाठी शेवटी त्या बालकाच्या धडावर भगवान श्री विष्णूंनी आणलेले गज मस्तक बसविण्यात आले. त्यांना श्री गजानन असे म्हटले आहे. ही श्री गणेश जन्माची कथा आपण नेहमी ऐकतो ती या अवताराची कथा आहे. या अवतारात भगवान श्री गणेशांचे नाव आहे उमांगमलज.
आपली बुद्धी हीच पार्वती देवी आहे. तिच्यावर चढलेला अहंकार आणि ममत्वाचा थर हाच मळ आहे. हा अहंकार आणि ममत्व दूर झाले की ज्या मोरयांची प्राप्ती होते त्यांना उमांगमलज असे म्हणतात.
– सुनील रासने, अध्यक्ष, श्रीमंत दगडूशेठ हलवाई गणपती ट्रस्ट.
