नगरसेवकपदासाठी इच्छुकांनो, “निवडणूक ही फास्ट ट्रेनप्रमाणे, उशीर झाला तर प्लॅटफॉर्मवरच राहाल” !
मंत्री चंद्रकांत पाटील यांचा कानमंत्र : दिवाळीनंतर दोन दिवसांत आचारसंहिता, कामाला लागा!
पुणे : आगामी जिल्हा परिषद निवडणुकीच्या पार्श्वभूमीवर भाजपचा “विजयी संकल्प मेळावा” आज मोठ्या उत्साहात पार पडला. या मेळाव्यात उच्च व तंत्र शिक्षणमंत्री चंद्रकांत पाटील यांनी कार्यकर्त्यांना आगामी निवडणुकीसाठी सज्ज होण्याचा सल्ला देत महत्त्वाचे राजकीय संकेत दिले.
“निवडणूक ही फास्ट ट्रेनसारखी असते, प्लॅटफॉर्मवर राहिलात तर ती निघून जाईल. नाराज होऊ नका, प्रयत्नांबरोबर नशीबही लागते,” असे सांगून त्यांनी कार्यकर्त्यांना जोमाने तयारीला लागण्याचा कानमंत्र दिला.
ZP निवडणुकीची घोषणा लवकरच?
चंद्रकांत पाटील यांनी स्पष्ट संकेत दिले की, “आज संध्याकाळपर्यंत जिल्हा परिषद निवडणुकीची घोषणा होण्याची शक्यता आहे.” त्यांनी पुढे सांगितले की, “मी ४० वर्षे निवडणुका पाहिल्या आहेत, त्यामुळे निवडणूक आयोगाशी चर्चा झाली, असे समजायचे कारण नाही — हा फक्त अनुभवावर आधारित अंदाज आहे.” त्यांनी सूचकपणे म्हटले की, “दिवाळीनंतर दोन दिवसांत आचारसंहिता लागेल, त्यामुळे आतापासून तयारीला लागा.”
“महायुती म्हणून लढायचं, पण कार्यकर्त्यांवर अन्याय नाही”
पाटील यांनी मेळाव्यात स्पष्ट केले की, “निवडणूक महायुती म्हणून लढवायची आहे. मात्र, जर राष्ट्रवादी काँग्रेस किंवा शिवसेना एखादं ठिकाण मागत असेल आणि तिथे भाजपचा चांगला उमेदवार असेल, तर ‘मैत्रीत लढणार’ पण कार्यक म्हणाले, “वरिष्ठ नेते शेवटचा निर्णय घेतील, पण कोणत्याही भाजप कार्यकर्त्यावर अन्याय होऊ देणार नाही.”
चंद्रकांत पाटील यांनी २०१९ साली शिवसेना प्रमुख उद्धव ठाकरे यांच्या भूमिकेवरही टीका केली. “उद्धव ठाकरे यांनी थोडी समजूत दाखवली असती, तर आज शिवसेनेला काँग्रेस-राष्ट्रवादीच्या वाटेला जावं लागलं नसतं,” असा टोला त्यांनी लगावला. “२०१९ साली सरकार जाणं ही नियती होती. पण उद्धव ठाकरेंनी ‘उतू नको मातू नको, घेतला वसा सोडू नको’ अशी भूमिका घेतली — आणि त्यातून काय मिळालं?”, असा प्रश्नही त्यांनी उपस्थित केला.
हेही वाचा – पुणे महापालिकेची अंतिम प्रभाग रचना जाहीर; काही प्रभागांच्या नावांसह हद्दीत बदल
भाजप कार्यकर्त्यांना आदेश, नव्हे प्रेरणा
चंद्रकांत पाटील यांनी स्वतःच्या भूमिकेचे उदाहरण देत सांगितले की, “मी कधीच कोणतेही तिकीट मागितले नाही. नेत्याची इच्छा म्हणजे कार्यकर्त्यांसाठी आज्ञा असते.” ते म्हणाले की, “२०१९ मध्ये ज्यांना तिकीट नाकारले गेले, त्या बावनकुळे यांना आता २०२४ च्या विधानसभा निवडणुकीचे उमेदवार ठरवण्याचे अधिकार दिले गेले आहेत. त्यामुळे राजकारणात संधीसुद्धा मिळते – फक्त संयम आणि कार्य आवश्यक आहे.”
“२०१७ विसरू नका, २०२४ जिंकण्यासाठी दिवाळीचा वापर करा”
पाटील यांनी कार्यकर्त्यांना आठवण करून दिली की, “२०१७ मधील परिस्थिती बदलायची असेल, तर या दिवाळीतच मतदारांशी संपर्क वाढवा. लोकांमध्ये मिसळा, त्यांचे प्रश्न समजून घ्या. कारण २०२४चा पाया हीच ZP निवडणूक ठरू शकते.” चंद्रकांत पाटील यांच्या भाषणातून स्पष्ट संकेत मिळतात की जिल्हा परिषद निवडणुका आता फार लांब नाहीत. त्यांनी कार्यकर्त्यांना स्पष्ट संदेश दिला आहे — “राजकारणात संयम, मेहनत आणि वेळेवर तयारी या गोष्टींवरच यश अवलंबून असते.”
