- हडपसर भागात काळवीट आढळले; कात्रज उद्यानात मृत्यू
पुणे – हडपसर भागात कालव्यालगत शुक्रवारी सकाळी काळवीट आढळून आले. नागरिकांनी नागरी वस्तीत भरकटलेल्या काळविटाला पाहताच अग्निशमन दल तसेच वन विभागाला ही माहिती दिली. अग्निशमन दलाच्या जवानांनी काळविटाला जाळ्यात पकडून कात्रज येथील राजीव गांधी प्राणिसंग्रहालयात दाखल केले. दरम्यान घाबरलेल्या काळविटाचा कात्रज येथील रुग्णालयात दुपारी मृत्यू झाला.
दौंड आणि भिगवण परिसरात मोठय़ा संख्येने काळवीट, हरीण, सांबर आहेत. बारामती तालुक्यात त्यांच्यासाठी राखीव क्षेत्र तयार करण्यात आले आहे. दौंड आणि भिगवण भागातून एक काळवीट कालवामार्गे हडपसर भागात सकाळी आले. खडकवासला धरणातून पाणी सोडणे बंद केल्यानंतर सध्या कालव्यात पाणी नाही. हडपसर भागातील उन्नतीनगर, सातववाडी परिसरात सकाळी काळवीट आढळून आल्याने नागरिकांनी तातडीने पोलीस, अग्निशमन दल तसेच वन विभागाला ही माहिती दिली. काळविटाला पाहण्यासाठी या भागात गर्दी झाली होती.
