बेहिशेबी मालमत्ताप्रकरणी माजी नगरसेवक सुभाष जगताप यांना पत्नीसह अटक
पुणे – पदाचा गैरवापर करून १ कोटी ३३ लाख ३९ हजार ५९२ रुपयांची बेहिशेबी मालमत्ता जमविल्याप्रकरणी राष्ट्रवादी काँग्रेस पक्षाचे माजी नगरसेवक सुभाष जगताप आणि त्यांच्या पत्नी उषा जगताप यांच्याविरुद्ध दाखल झालेल्या गुन्ह्यात लाचलुचपत प्रतिबंधक विभागाने शुक्रवारी दोषारोपपत्र दाखल केले.
जगताप हे १९९५ ते २०१२ दरम्यान सहकारनगर परिसरात नगरसेवक होते. २०१४ मध्ये त्यांनी विधानसभा निवडणूक लढविली होती. त्यांच्या उत्पन्नाच्या स्रोतापेक्षा त्यांच्याकडे १ कोटी ३३ लाख ३९ हजार ५९२ रुपयांची अधिकची मालमत्ता आढळून आली आहे. तिचा हिशेब त्यांना सादर करता आलेला नाही, असे पोलिसांनी न्यायालयात म्हटले आहे. जगताप यांची उघड, त्यानंतर गुप्त चौकशी झाली होती. जगताप यांच्याविरुद्ध दोषारोपपत्र सादर करण्यासाठी गेल्यावर्षी आॅक्टोबरमध्ये पोलिसांनी राज्य सरकारकडे चौकशी मागितली होती. त्याला गेल्या महिन्यात परवानगी मिळाली. त्यानंतर पोलिसांनी दोषारोपपत्र दाखल केले.