पुणे, पिंपरी-चिंचवडमध्ये डिसेंबर-जानेवारीत करोनाची दूसरी लाट
![# Covid-19: 10 lakh 50 thousand 445 corona infected patients in Pune division are cured at home - Divisional Commissioner Saurabh Rao](https://mahaenews.com/wp-content/uploads/2020/10/sourabh-rao.jpg)
‘माझे कुटुंब, माझी जबाबदारी’ या मोहिमेंतर्गत ‘पुण्याचा निर्धार करोना हद्दपार’ – विभागीय आयुक्त साैरभ राव
पुणे |महाईन्यूज|
‘पुणे आणि पिंपरी-चिंचवड शहरांमध्ये दैनंदिन चाचण्यांच्या तुलनेत रुग्ण सापडण्याचे प्रमाण सुमारे १६ टक्के असून, धोका अद्याप टळलेला नाही. डिसेंबर-जानेवारी महिन्यांत करोनाची दुसरी लाट येण्याची शक्यता आहे. त्यामुळे ‘माझे कुटुंब, माझी जबाबदारी’ या मोहिमेंतर्गत ‘पुण्याचा निर्धार करोना हद्दपार’ हे अभियान राबवून जनजागृती केली जाणार आहे,’ असे विभागीय आयुक्त सौरभ राव यांनी सांगितले.
राव म्हणाले, ‘पुणे आणि पिंपरी-चिंचवडमध्ये दैनंदिन चाचण्यांच्या तुलनेत रुग्ण सापडण्याचे प्रमाण ऑगस्ट महिनाअखेरीस सुमारे २६ टक्के होते. सप्टेंबर महिन्याच्या सुरुवातीला हे प्रमाण सुमारे २५ टक्के आणि सप्टेंबर महिनाअखेरीस सुमारे २३.५० टक्के होते. भारतीय वैद्यकीय संशोधन परिषदेच्या (आयसीएमआर) मार्गदर्शक तत्त्वांनुसार दैनंदिन चाचण्यांच्या तुलनेत रुग्ण सापडण्याचे प्रमाण १० टक्क्यांपेक्षा कमी असल्यास धोक्याची पातळी कमी झाल्याचे समजले जाते. त्यानुसार पुण्यातील धोका अद्याप टळलेला नाही.’
‘करोनाची दुसरी लाट ही पहिल्याप्रमाणे तीव्र नसेल, असा अंदाज वैद्यकीय तज्ज्ञांकडून वर्तवण्यात येत आहे. मात्र, याबाबत अद्याप निश्चित माहिती प्राप्त झालेली नाही. त्यामुळे नागरिकांनी मास्क वापरणे, सुरक्षित वावर राखणे आवश्यक आहे,’ असे राव यांनी स्पष्ट केले. ‘माझे कुटुंब माझी जबाबदारी’ या मोहिमेचा पहिला टप्पा १० ऑक्टोबरला संपला असून, त्यात सुमारे ९१ टक्के नागरिकांचे सर्वेक्षण करण्यात आले.
पावसाळा संपल्यावर थंडी सुरू होणार असल्याने सर्दी, खोकला, ताप या आजारांत वाढ होणार आहे. नवरात्र, दिवाळी आणि नाताळ यांसारखे सण आणि लॉकडाउनमध्ये आणलेल्या शिथिलतेमुळे सर्व क्षेत्रे खुली होत आहेत. त्यामुळे पुण्यात डिसेंबर-जानेवारीत करोनाची दुसरी लाट येण्याची शक्यता आहे. केंद्रीय आरोग्य मंत्रालयाकडून करोनाच्या दुसऱ्या लाटेबाबत सतर्क राहण्याबाबत सूचना आल्या आहेत.
- सौरभ राव, विभागीय आयुक्त