‘मुंबईच्या चकचकीत दुनियेतून बाहेर निघून फिरा महाराष्ट्रात’, प्रवीण दरेकरांचा सचिन सावंत यांच्यावर हल्लाबोल
मुंबई – सर्वोच्च न्यायालयाने मराठा आरक्षणाचा कायदा रद्द केल्यानंतर राज्यातील राजकारण प्रचंड तापलं. हा वाद आता राज्य सरकार विरुद्ध विरोधी पक्ष असा निर्माण झालाय. त्यातच, दोहोंकडूनही आरोप-प्रत्यारोपाच्या फैरी झडत आहेत. त्यातच, राज्याचे विरोधी पक्षनेते प्रवीण दरेकर यांनी काँग्रेसचे प्रवक्ते सचिन सावंत यांना टोला लगावला आहे. “थोडं मुंबईच्या चकचकीत दुनियेतून बाहेर निघून फिरा महाराष्ट्रात… कळेल,” असं दरेकर म्हणाले.
मराठा आरक्षणाच्या मुद्द्यावर छत्रपती संभाजीराजे भोसले यांनी पंतप्रधान नरेंद्र मोदी यांची भेट मागितली होती. मात्र, भेटीसाठी वेळ न दिल्यानं राजकारण तापलं आहे. याच मुद्द्यावरून काँग्रेसचे प्रवक्ते सचिन सावंत यांनी ट्विट करत भाजपाला आव्हान दिलं. “कंगना राणावतला भेटणारे पंतप्रधान छत्रपती संभाजी राजेंना का भेटत नाहीत? या साध्या प्रश्नाचे उत्तर प्रविण दरेकरांना व भाजपाला देता येत नाही. असो! उद्या पुन्हा मी भाजपाची पोलखोल करुन मराठा आरक्षणाविरुध्द भाजपाचा कुटील डाव उघड करणार आहे. त्याही प्रश्नापासून पळ काढतात का? ते पाहू,” असं सावंत म्हणाले होते.
सावंत यांनी दिलेल्या आव्हानाला विधान परिषद विरोधी पक्षनेते प्रविण दरेकर यांनी उत्तर दिलं आहे. दरेकर यांनी ट्विट केलं असून, शिवसेनेवरही निशाणा साधला आहे. “ज्यांच्यासाठी बाजू मांडताय, त्यांची आता एव्हढी लाज निघालीय ना मराठा आरक्षणाबाबत सचिन सावंतजी, थोडं मुंबईच्या चकचकीत दुनियेतून बाहेर निघून फिरा महाराष्ट्रात… कळेल. ‘पोलखोल’ च्या नादात स्वपक्षाची आणि महाविकास आघाडीचीच लक्तरं तुम्ही वेशीवर टांगत आहात!,” असं दरेकर म्हणाले.
“बाकी विषय भरकटवण्यात तुम्ही, काँगेस आणि तुमचे सहकारी पक्ष यांचा हात कुणी धरू शकणार नाही. भाजपाची पोलखोल करण्यात वेळ घालवण्यापेक्षा मराठा आरक्षण कसं मिळेल याचा सल्ला सरकारला द्या. राहता राहिला प्रश्न ‘पोलखोलचा’ तर… महाविकास आघाडीचा मराठा आरक्षण न देण्याचा ‘नियोजनबद्ध दुर्लक्षपणाचा बुरखा’ आपल्या पोलखोलीनंतर मराठा बांधव आणि महाराष्ट्रासमोर आम्हीच टराटरा फाडू!,” असा इशाराही प्रविण दरेकर यांनी सचिन सावंत यांना दिला.
ज्यांच्यासाठी बाजू मांडताय त्यांची आता एव्हढी लाज निघालीय ना मराठा आरक्षणाबाबत @sachin_inc जी,
थोडं मुंबईच्या चकचकीत दुनियेतून बाहेर निघून फिरा महाराष्ट्रात… कळेल
'पोलखोल' च्या नादात स्वपक्षाची आणि महाविकास आघाडीचीच लक्तरं तुम्ही वेशीवर टांगत आहात!— Pravin Darekar – प्रविण दरेकर (@mipravindarekar) May 26, 2021
