सर्वोच्च न्यायालयात खळबळजनक घटना! सरन्यायाधीशांवर वकिलाचा हल्ल्याचा प्रयत्न
नवी दिल्ली | सर्वोच्च न्यायालयात आज (सोमवार) एक धक्कादायक घटना घडली. न्यायालयात सुनावणीदरम्यान एका वकिलाने सरन्यायाधीश भूषण गवई यांच्या दिशेने बूट फेकून मारण्याचा प्रयत्न केला. मात्र प्रसंगावधानाने सुरक्षारक्षकांनी तत्काळ त्या वकिलाला रोखून बाहेर काढलं आणि पोलिसांच्या ताब्यात दिलं.
घटनेदरम्यान वकील “सनातन धर्माचा अपमान सहन केला जाणार नाही” अशा घोषणा देत न्यायालयाच्या दिशेने धावला. त्याने पायातील बूट काढून सरन्यायाधीशांकडे भिरकावण्याचा प्रयत्न केला. मात्र सुरक्षारक्षकांनी वेळेत हस्तक्षेप करत मोठा अनर्थ टाळला.
या प्रकारानंतरही सरन्यायाधीश गवई यांनी संयम राखत न्यायालयीन कामकाज सुरू ठेवण्याचं आवाहन केलं. ते म्हणाले, “या घटनेमुळे कोणालाही विचलित होऊ नका. मीही विचलित झालो नाही. अशा घटनांनी माझ्यावर काही परिणाम होत नाही.”
हल्ल्याचा प्रयत्न करणाऱ्या वकिलाचं नाव राकेश किशोर असं असून, त्याला पोलिसांच्या ताब्यात देण्यात आलं आहे.
या घटनेचं पार्श्वभूमी विष्णू मंदिर प्रकरणाशी संबंधित आहे. काही दिवसांपूर्वी या सुनावणीत सरन्यायाधीश गवई यांनी याचिकाकर्त्याला “तुमची तक्रार असेल तर भगवान विष्णूकडे जा” असं वक्तव्य केलं होतं. या विधानावर हिंदुत्ववादी संघटनांनी आक्षेप घेत टीका केली होती. याच संतापातून राकेश किशोर नावाच्या वकिलाने आज न्यायालयात गोंधळ घालून हल्ल्याचा प्रयत्न केला.
