नागपूरमधील स्फोटानंतर मुख्यमंत्री फडणवीसांनी केले ‘हे’ आवाहन
Devendra Fadanvis : नागपूर जिल्ह्यातील काटोल तालुक्यातील राऊळगाव येथे खाण आणि औद्योगिक स्फोटकांचे उत्पादन करणाऱ्या एसबीएल एनर्जी लिमिटेडमध्ये रविवारी झालेल्या स्फोटात किमान १९ कामगारांचा मृत्यू झाला आणि २३ जण जखमी झाले. यानंतर, मुख्यमंत्री देवेंद्र फडणवीस यांनी स्फोटकांच्या निर्मितीतील काही विशिष्ट प्रोटोकॉल आणि प्रक्रियांचे १०० टक्के ऑटोमेशन करण्याचे आवाहन केले आहे.
या युनिटची मालकी असलेल्या एसबीएल एनर्जी लिमिटेडचे व्यवस्थापकीय संचालकांना या स्फोटाप्रकरणी अटक करण्यात आल्याची माहिती त्यांनी दिली. नागपूरमधील एका खाजगी रुग्णालयात दाखल केलेल्या काही जखमींना भेटल्यानंतर फडणवीस हे पत्रकारांशी बोलत होते. फडणवीस म्हणाले, अगदी थोडीशी मानवी चूक देखील अपघातांना कारणीभूत ठरते.
हेही वाचा – इराणविरोधातील युद्धात आखाती देश लक्ष्य! गेल्या ४८ तासांत मोदींनी साधला ८ देशांशी संपर्क
भविष्यात अशा दुर्घटना टाळण्यासाठी स्फोटकांच्या उत्पादन सुविधांमध्ये काही विशिष्ट ऑपरेशन्सचे पूर्ण ऑटोमेशन करण्याचे आवाहन केले आहे. राज्य सरकार या तांत्रिक पैलूचा अभ्यास करून, एक सविस्तर अहवाल तयार करेल, जो केंद्राला विचारार्थ पाठवला जाईल. या स्फोटासंदर्भात २१ जणांविरुद्ध एफआयआर दाखल करण्यात आला आहे.
त्यापैकी ११ जणांना अटक करण्यात आली आहे, ज्यामध्ये एसबीएल एनर्जीचे व्यवस्थापकीय संचालकांचा समावेश आहे. अशा संवेदनशील आस्थापनांचे नियमन करणारे नियम २००८ पासूनचे आहेत. तेव्हापासून तंत्रज्ञानात मोठे बदल झाले आहेत. म्हणूनच, या युनिट्सना नियंत्रित करणाऱ्या प्रोटोकॉलचा पुनर्विचार करण्याची गरज आहे.
अशा आस्थापनांचे सुरक्षा ऑडिट केल्यानंतरही अपघात होतात आणि या दुर्घटनांमागील मुख्य कारण म्हणजे देखरेखीचा अभाव किंवा अधिकाऱ्यांचा निष्काळजीपणा हे आहे का? हे तपासण्याची गरज असल्याचे फडणवीस यांनी म्हटले.
