खासदार सुप्रिया सुळेंच्या निलंबनावर अजित पवारांची प्रतिक्रिया; म्हणाले..
![Ajit Pawar said that Supriya Sule was not suspended alone](https://mahaenews.com/wp-content/uploads/2023/12/Ajit-Pawar-and-Supriya-Sule-780x470.jpg)
पुणे : संसदेच्या हिवाळी अधिवेशनादरम्यान विरोधी पक्षातील १४६ खासदारांचं लोकसभा आणि राज्यसभेतून निलंबन करण्यात आलं आहे. निलंबन केलेल्या खासदारांमध्ये राष्ट्रवादी काँग्रेसच्या खासदार सुप्रिया सुळे आणि अमोल कोल्हे यांचाही समावेश आहे. यावरून उपमुख्यमंत्री अजित पवार यांनी पहिली प्रतिक्रिया दिली आहे. ते पुण्यात पत्रकारांशी बोलत होते.
अजित पवार म्हणाले, केवळ सुप्रिया सुळे यांचं एकट्याचंच निलंबन झालं नाही. अनेक खासदारांचं निलंबन झालं आहे. जेव्हा खासदार किंवा आमदार विधिमंडळांत, लोकसभेत आणि राज्यसभेत काम करत असतात. त्यावेळी कुठल्या तरी नियमाचा भंग झाल्यास त्याप्रमाणे कारवाई केली जाते. त्यानुसारच निलंबनाची कारवाई झालेली आपण पाहिली आहे.
हेही वाचा – महाराष्ट्राचे चिराग शेट्टी, ओजस देवतळे, अदिती स्वामी, गणेश देवरूखकर यांना राष्ट्रीय क्रीडा पुरस्कार
तिथे काय घडलं? हे मला माहीत नाही. विधानसभेत काय घडलं? हे विचारलं असतं तर मी सांगितलं असतं. माझ्या माहितीप्रमाणे संसदेत उपराष्ट्रपतींचा अपमान करण्यात आला. राष्ट्रपती, उपराष्ट्रपती, पंतप्रधान किंवा कुठल्याही राज्याचे मुख्यमंत्री असतील, ही महत्त्वाची पदं आहेत. एवढ्या मोठ्या भारतात लोकशाही पद्धतीने निवडून गेलेले ते लोक असतात. ते आपापलं काम योग्य पद्धतीने करत असतात. कारण ज्यावेळी एवढा मोठा समाज त्यांच्या पाठिशी उभा राहतो आणि त्यांच्या विचारांच्या लोकांना निवडून देतो. याचा अर्थ त्यांनी कुठेतरी जनाधार मिळवलेला असतो. उपराष्ट्रपतीही अतिशय व्यवस्थितपणे आपलं स्वत:चं काम पार पाडत असतात. असं असताना तिथे जी काही घटना घडली, त्यामुळे त्यांच्यावर ती कारवाई झाली आह, असंही अजित पवार म्हणाले.