मार्केट यार्ड परिसरात गोळीबार करुन २८ लाख लुटले, दोन दिवसांत ७ जणांना बेड्या
पुण्यात मार्केट यार्ड परिसरात गोळीबार
पुणे । महाईन्यूज । विशेष प्रतिनिधी ।
शहरात मार्केट यार्ड परिसरात अंगडीयाच्या कार्यालयात भरदिवसा घुसून गोळीबार करून २८ लाख रुपयांची रोकड लुटल्याचा प्रकार घडला होता. या चोरट्यांना पुणे पोलिसांच्या खंडणी विरोधी पथकाने अवघ्या दोन दिवसात बेड्या ठोकल्या आहेत. ही घटना शनिवारी दुपारी साडे बारा वाजण्याच्या सुमारास मार्केट यार्ड येथे घडली होती. पोलिसांनी आरोपींकडून ११ लाखाची रोकड, तीन दुचाकी, मोबाईल असा १३ लाख रुपयांचा मुद्देमाल जप्त केला आहे.
या प्रकरणी पोलिसांनी अविनाश उर्फ सनी रामप्रताप गुप्ता (वय २०, मंगळवार पेठ), आदित्य अशोक मारणे (वय २८, रामनगर, वारजे), दीपक ओम प्रकाश शर्मा ( वय १९, राहुलनगर शिवणे), विशाल सतीश (वय २०, मंगळवार पेठ), अजय बापू दिवटे (वय २३, श्रीराम चौक वारजे), गुरुजनसिंह सेवासिंह विरक (वय २२, शिवाजीनगर), निलेश बाळू (वय २०, एस. आर. ए. स्कीम, मंगळवार पेठ) यांना अटक केली आहे.
पोलिसांनी दिलेल्या माहितीनुसार, मार्केटयार्ड येथील गेट नंबर दोन येथे गणराज मार्केट नावाची इमारत आहे. संबंधित इमारतीमध्येच द प्रोफेशनल कुरिअर नावाने अंगडीयाचा व्यवसाय चालतो. तर इमारतीच्या पाठीमागील बाजुला असलेल्या पोटमाळावजा जागेत त्याचे कार्यालय आहे. येथे शनिवारी दुपारी साडे बारा वाजण्याच्या सुमारास अंगडीयाच्या कार्यालयात दोन कर्मचारी उपस्थित होते. ते काचेच्या केबिनमध्ये बसून त्यांचे नियमीत काम करीत होते. त्यावेळी एक व्यक्ती तेथे आला, त्यानंतर तो थेट कर्मचारी काम करीत असलेल्या काचेच्या केबिनमध्ये घुसण्याचा प्रयत्न करु लागला. यातील एका कर्मचाऱ्याने त्याला धक्का देऊन बाहेर काढत दार लावून घेतले.
त्यानंतर संबंधित व्यक्तीने कोयता काढून केबिनची काच फोडली. तर त्याच्या मागून आलेल्या दुसऱ्या व्यक्तीने थेट पिस्तूल काढून जमिनीवर गोळी झाडली. त्यापैकी एकाने केबिनमध्ये घुसून तेथील रोकड बाहेरील व्यक्तीकडे दिली. त्यांनी रोकड पिशवीमध्ये भरुन तेथून पळ काढला.
दरम्यान, इमारतीच्या बाहेर त्यांनी त्यांचे तीन साथीदार थांबविले होते. दरोडा टाकल्यानंतर पाचही जणांनी धावत जाऊन पुढे थांबलेल्या दोन दुचाकींवरुन पळ काढला. दरम्यान, या घटनेची माहिती मिळताच अतिरीक्त पोलीस आयुक्त नामदेव चव्हाण, सहाय्यक पोलीस आयुक्त पौर्णिमा तावरे, गुन्हे शाखेचे पोलीस निरीक्षक हेमंत पाटील यांनी घटनास्थळी भेट दिली.
