भरतनाट्यम अरंगेत्रम सोहळ्यात वेदिका, अनन्या, नित्या, जुही यांचा मनमोहक नृत्याविष्कार

पिंपरी-चिंचवड : कलांजली नृत्य अकॅडमीच्या चार प्रतिभावान विद्यार्थिनी — वेदिका सुर्वे, अनन्या रोहिणकर, नित्या पंडित आणि जुही वायकोले — यांचा भरतनाट्यम अरंगेत्रम हा नृत्यप्रयोग पुण्यातील सिंबायोसिस कॉलेज, विमाननगर येथे शनिवारी दिमाखात पार पडला.

गेल्या १४ वर्षांपासून या चौघी विद्यार्थिनींनी आपल्या गुरु सौ. गौरी देशपांडे यांच्या मार्गदर्शनाखाली भरतनाट्यमचे शास्त्रीय प्रशिक्षण घेतले आहे. दीर्घ साधना, नृत्यावरील निष्ठा आणि सातत्यपूर्ण परिश्रम यांचे फलस्वरूप म्हणून साकारलेला हा अरंगेत्रम सोहळा त्यांच्या नृत्य प्रवासातील एक मैलाचा दगड ठरला.

‘अरंगेत्रम’ हा भरतनाट्यम कलाविश्वातील विद्यार्थिनीच्या नृत्यजीवनातील दीक्षा समारंभ मानला जातो — ज्यामध्ये ती पहिल्यांदाच सार्वजनिकरित्या एकल नृत्यप्रयोग सादर करते. या चारही नर्तिकांनी आपल्या भावपूर्ण मुद्राभिनय, लयबद्ध पादक्रम आणि कलात्मक अभिव्यक्तीद्वारे प्रेक्षकांची मनं जिंकली.

हेही वाचा –  सर्वोत्कृष्ट जनसंपर्कासाठी महापारेषणचा जागतिक पातळीवर गौरव; इटलीमध्ये २८ जानेवारीला होणार पुरस्काराचे वितरण

सुंदर पारंपरिक वेशभूषा, सुरेल शास्त्रीय संगीत आणि सुसंवादी नृत्यरचना यांनी कार्यक्रमाला वेगळीच झळाळी दिली. सुमारे ४०० प्रेक्षकांनी या कलासोहळ्याला हजेरी लावली आणि प्रत्येक सादरीकरणानंतर टाळ्यांच्या गजरात नर्तिकांचे कौतुक केले. कार्यक्रमाच्या शेवटी गुरु गौरी देशपांडे यांचा विशेष सत्कार करण्यात आला. तसेच सर्व नर्तिका आणि त्यांच्या पालकांचे अभिनंदन करून या अविस्मरणीय क्षणाचे स्मरणरंजन करण्यात आले. हा अरंगेत्रम सोहळा कलांजली नृत्य अकॅडमीसाठी आणि संबंधित कुटुंबियांसाठी अभिमानाचा तसेच भावनिक आनंदाचा सोहळा ठरला.

महाईन्यूज-X वर फॉलो करा : महाईन्यूजला instagram वर फॉलो करा

“वेदिका, अनन्या, नित्या आणि जुही या चौघींचा आजचा अरंगेत्रम हा केवळ त्यांच्या नृत्यप्रवासाचा टप्पा नाही, तर त्यांच्या समर्पण, संयम आणि कलेवरील प्रेमाचे सुंदर फळ आहे. गुरु म्हणून मला अत्यंत अभिमान वाटतो की या विद्यार्थिनींनी परंपरेचा सन्मान राखत आधुनिकतेशीही नाजूक संतुलन साधले आहे. त्यांच्या प्रत्येक हालचालीत साधनेची झलक आणि आत्मभाव दिसतो — हाच खरा कलाकाराचा विजय आहे.

– गौरी देशपांडे, प्रशिक्षक.