बदलीसाठी पोलीस आयुक्तांच्या नावाखाली पोलिसांकडून पैसे उकळण्याचा पराक्रम
![The power to extort money from the police in the name of the Commissioner of Police for transfer](https://mahaenews.com/wp-content/uploads/2022/03/The-power-to-extort-money.jpg)
- नियंत्रण कक्षातून पीआय बोलत असल्याची केली बतावणी.
पोलीस हवालदार रुपाली रविंद्र सोनवणे (वय 33) यांनी याबाबत भोसरी एम आय डी सी पोलीस ठाण्यात फिर्याद दिली आहे. त्यावरून पीआय पाटील या इसमाविरोधात भारतीय दंड विधान कलम 420, 384, 419, 170 अंतर्गत फसवणूकीचा गुन्हा दाखल करण्यात आला आहे.
पोलिसांनी दिलेल्या माहितीनुसार, आरोपी इसमाने भोसरी एम आय डी सी पोलीस ठाण्यात फोन केला. नियंत्रण कक्षातून पीआय पाटील बोलतोय असे सांगून पाच वर्षांपेक्षा अधिक कालावधी झालेल्या कर्मचाऱ्यांची नावे व मोबाईल नंबर घेतले. आरोपी इसमाने पोलीस कर्मचाऱ्यांना फोन करण्यास सुरुवात केली आणि तुमचा इथला कालावधी पूर्ण झाला आहे. तुम्हाला कुठे बदली हवीय तिथे नियुक्ती मिळेल. त्यासाठी पोलीस आयुक्तांना पैसे द्यावे लागतील. असे आरोपी पोलीस कर्मचाऱ्यांना सांगितले.फिर्यादी पोलीस हवालदार रुपाली यांच्याकडे पंधरा हजार रुपयांची मागणी केली. त्यापैकी फिर्यादी यांनी इसमाला पाच हजार रुपये पाठविले. काही वेळातच पोलीस ठाण्यातील इतर कर्मचाऱ्यांना देखील असेच फोन आले व पैशाची मागणी केल्याने हा प्रकार उघडकीस आला. त्यानंतर अज्ञात इसमाविरोधात फसवणूकीचा गुन्हा दाखल करण्यात आला असून, भोसरी एम आय डी सी पोलीस अधिक तपास करीत आहेत.