पिंपरी-चिंचवड। किवळे-मुकाई चौकशेजारी मद्यपींचा अड्डा; फूटपाथवरच ‘बैठक’!

पिंपरी । किवळे-मुकाई चौकशेजारी मद्यपींचा अड्डा तयार झाला असून, सायंकाळी या ठिकाणी मद्यपी ठिय्या मांडून बसलेले दिसतात. प्रचंड रहदारी असलेल्या या चौकात नियमितपणे पोलीस कर्मचारी असतात, मात्र याकडे कानाडोळा होत आहे. त्यामुळे सोसयटीधारक नागरिक, पदाचारी यांना नाहक त्रास सहन करावा लागत आहे.

किवळे येथे कोहिनूर गार्डीअर सोसायटीसमाेरच ‘‘बैठक’’ रोज सायंकाळी पहायला मिळते. या भागात वाईन्स शॉप, स्नॅक सेंटर्स मोठ्या प्रमाणात आहेत. कोहिनूर सोसायटीसमोर फूटपाथवर नागरिकाची ये-जा असते. मात्र, पार्किंच्या बाजुला असलेल्या कठड्यावर मद्यपी खुलेआम मद्यप्राशन करीत बसतात. अनेकदा त्यांच्यामध्ये वादाचा प्रसंगही घडला आहे. रात्री उशीरापर्यंत मद्यपान करणाऱ्या मद्यपींच्या गोंधळामुळे  या सोसायटीतील नागरिकांना नाहक मन:स्ताप सहन करावा लागत आहे.