कुंभमेळ्याच्या पार्श्वभूमीवर सायबर गुन्हेगार सक्रिय

पिंपरी :  कुंभमेळ्याच्या नावाचा गैरवापर करण्यासाठी काही सायबर चोरटे सक्रिय झाले असून त्याद्वारे फसवणूक होण्याची शक्यता आहे. त्यामुळे नागरिकांनी सावध राहावे, असे आवाहन गुन्हे शाखेचे पोलीस उपायुक्त संदीप डोईफोडे यांनी केले आहे. कुंभमेळा या धार्मिक कार्यक्रमांच्या निमित्ताने सायबर गुन्हेगार इंटरनेटच्या माध्यमातून डिजीटल सुविधेचा गैरवापर करून भाविकांच्या श्रद्धेचा गैरफायदा घेत आहेत. बनावट वेबसाइट, लिंक किंवा इतर माध्यमांचा वापर करुन नागरिकांची फसवणूक करत असल्याचे केंद्र सरकार गृहमंत्रालयाच्या निदर्शनास आले आहे. बनावट वेबसाइटद्वारे कुंभमेळ्यासाठी देणगी गोळा
करण्याच्या नावाखाली बनावट वेबसाइटचा वापर करून आर्थिक फसवणूक केली जात
आहे. तसेच, ऑनलाइन बुकींगद्वारे फसवणूक करण्याकरिता भाविकांसाठी निवास
व्यवस्था, दर्शन पास आदी बुकींगच्या नावाखाली बनावट वेबसाइटद्वारे पैसे उकळले जात आहेत.

हे फसवणुकीचे प्रकार टाळण्यासाठी नागरिकांनी बनावट लिंक टाळावी. कुंभमेळा
संबंधी बनावट लिंक, बेवसाईटस किंवा मॅसेजवर क्लिक करू नये. सत्यता तपासावी. कुंभमेळा संबंधी अधिक माहीतीसाठी अधिकृत वेबसाइटवर संपर्क साधावा. आपली गोपनीय माहिती शेअर करू नये. बँक खाते क्रमांक, पासवर्ड किंवा इतर कोणतीही संवेदनशील माहिती कोणालाही देऊ नये. फसवणुकीचा संशय आल्यास सायबर हेल्पलाइन किंवा १९३० वर संपर्क साधावा, असे आवाहन करण्यात आले आहे.