कोरोनाची संभाव्य तिसरी लाट; पिंपरी चिंचवड शहरात सिरो सर्व्हे करणार – महापाैर उषा ढोरे
![A possible third wave of corona; Siro will conduct survey in Pimpri Chinchwad city - Mahapair Usha Dhore](https://mahaenews.com/wp-content/uploads/2021/06/88.jpg)
पिंपरी |महाईन्यूज|
कोरोनाची संभाव्य तिसरी लाट लक्षात घेवून पिंपरी चिंचवड शहरात सिरो सर्व्हे करण्यात येणार आहे. शहरातील सुमारे १० हजार नागरिकांचे रक्त नमुने तपासण्यात येणार आहेत. या कामासाठी घरी येणा-या महानगरपालिकेच्या वैद्यकीय पथकास रक्त नमुने घेण्याकामी शहरवासीयांनी सहकार्य करावे. असे आवाहन महापौर उषा उर्फ माई ढोरे यांनी केले आहे.
पिंपरी चिंचवड महानगरपालिकेच्या कार्यक्षेत्रातील नागरिकांमध्ये कोविड-१९ या संसर्गजन्य विषाणूचा प्रादुर्भाव पहिल्या व दुस-या लाटेमध्ये झालेला आहे. संभाव्य तिस-या लाटेच्या पार्श्वभूमीवर शहरातील विविध भागातील दहा हजार नागरिकांच्या Antibodies तपासणी करण्यात येणार आहेत. त्याचा उपयोग शहरातील किती नागरिकांमध्ये रोग प्रतिकारशक्ती तयार झाली आहे याचा अंदाज घेण्यासाठी होईल जेणेकरून संभाव्य तिस-या लाटेच्या पार्श्वभूमीवर पुढील उपचार करणे शक्य होईल.
महानगरपालिकेच्या ८ रुग्णालयांमधून प्रत्येकी ३ टीम तयार करण्यात येणार असून यासाठी वैद्यकीय अधिकारी, कर्मचारी असे १५० जणांची याकरिता नियुक्ती करण्यात आली आहे. सदर टीमद्वारे पुढील दहा दिवस शहरातील २०० भागांमध्ये Antibody तपासणी मोहीम राबविण्यात येणार आहे. महापौर माई ढोरे म्हणाल्या, शहरातील कोरोना बाधितांची संख्या कमी झाली असून ही समाधानकारक बाब असली तरी तिसरी लाट येण्याची शक्यता तज्ञांनी व्यक्त केली आहे. त्यामुळे महानगरपालिकेच्या वैद्यकीय, आरोग्य आणि प्रशासन विभागास त्याअनुषंगाने तयारी करण्याच्या सूचना देखील महापौर माई ढोरे यांनी दिल्या आहेत.