राहुल गांधींनी दिला होकार, पुण्यात काँग्रेसचा उमेदवार ठरला !
पुणे – काँग्रेस व राष्ट्रवादी काँग्रेस यांच्या आघाडीत पुणे लोकसभा मतदार संघ काँग्रेसकडे आहे. संभाजी ब्रिगेडचे राज्य अध्यक्ष प्रवीण गायकवाड हे काँग्रेसच्या तिकिटावर पुणे लोकसभा मतदारसंघात उमेदवार असणार आहेत. त्यांच्या उमेदवारीला काँग्रेस अध्यक्ष राहुल गांधींनी हिरवा कंदील दाखविला आहे.
जातीय समीकरणे लक्षात घेत काँग्रेसने प्रवीण गायकवाड यांच्या नावावर शिक्कामोर्तब केलंय. प्रवीण गायकवाड यांच्या जनसंपर्काचा काँग्रेस आणि राष्ट्रवादीला फायदा होईल, असा अंदाज लावला जात आहे. शिवाय मराठा आरक्षणाच्या पार्श्वभूमीवर जे वातावरण तापलं होतं, त्याचाही राष्ट्रवादी-काँग्रेसकडून फायदा घेतला जाऊ शकतो.
काँग्रेसकडून पुण्यात विविध नावांवर चर्चा सुरु होती. भाजपचे सहयोगी खासदार संजय काकडेही काँग्रेसच्या तिकिटावर लढण्यासाठी इच्छुक होते. पण त्यांची आशा आता जवळपास मावळली आहे. राहुल गांधींनीच स्वतः प्रवीण गायकवाड यांना उमेदवारी दिल्यामुळे काँग्रेसने पुण्यात आता मराठा कार्ड खेळत निवडणुकीत नवा रंग भरलाय. पुण्यातील पदाधिकाऱ्यांनी इतर नावांची शिफारस केली होती.
दरम्यान, 2014 मध्ये पुण्यातून भाजपचे अनिल शिरोळे निवडून आले. त्यांना सर्व सहाही विधानसभा मतदार संघात भाजपाला मताधिक्य मिळालं होतं. पुणे लोकसभा मतदासंघातून काँग्रेसचे उमेदवार विश्वजीत कदम यांचा पराभव झाला.
