पिंपरी – लोणावळा खंडाळ्यासह मावळात मान्सून पावसाने दमदार हजेरी लावून शेतकऱ्यांना मोठा दिलासा आहे. दोन दिवसापासून कोसळलेल्या मुसळधार पावसाचा जोर रात्रभर अधिक वाढल्याने लोणावळ्यासह मावळाला चांगलेच झोडपले. धरणांच्या पाण्याच्या पातळीत वाढ होऊ लागली आहे. जोरदार पावसामुळे भुशी डॅम जवळपास पूर्ण भरला आहे.
पर्यटकांचे आकर्षण असलेले लोणावळ्यातील मुसळधार पावसामुळे लोणावळा परिसरातील जनजीवन विस्कळित झाले होते. मुसळधार पावसामुळे लोणावळ्यासह मावळातील अनेक ठिकाणचे रस्ते पाण्याखाली गेले होते. शहर परिसरातील अनेक ठिकाणी पाणी शिरल्याने नागरिकांची चांगलीच तारांबळ उडाली होती.
लोणावळ्यात २४ तासांत ३३५ मिमी, तर पवनाधरण परिसरात १६० मिमी पावसाची नोंद झाली आहे. शनिवारी पर्यटन आणि वर्षाविहारासाठी आलेल्या पर्यटकांनी लोणावळा-खंडाळ्यातील धबधब्यासह मावळातील धबधब्यात भिजण्याचा मनमुराद आनंद लुटला. भुशी डॅमसह लोणावळ्यातील टायगर, लायन्स, शिवलिंग, राजमाची पॉइंट, गिधाड तलाव, लोहगड, पवनाधरण, कार्ला, व भाजे लेणी व परिसरातील धबधबे आणि पर्यटनस्थळी पर्यटकांनी मोठी गर्दी केली होती.
