#Omicron : “…तर आम्हाला विचार करावा लागेल”; उपमुख्यमंत्री अजित पवारांचं विधान!
मुंबई |
“ओमायक्रॉन व्हेरिएंटची प्रकरणे वाढत राहिल्यास २८ डिसेंबर रोजी काँग्रेस नेते राहुल गांधी यांच्या मुंबई दौऱ्याला परवानगी देण्याबाबत प्रशासनाला विचार करावा लागेल.” असं विधान राज्याचे उपमुख्यमंत्री अजित पवार यांनी केलं आहे. काँग्रेस नेते राहुल गांधी यांच्या २८ डिसेंबर रोजीच्या मुंबई दौऱ्याच्या परवानगीबाबत माध्यमांनी उपमुख्यमंत्री अजित पवारांना विचारले होते, त्यावर, जर ओमायक्रानची प्रकरणे अशाचप्रकारे वाढत राहली, तर आम्हाला विचार करावा लागेल. अशी प्रतिक्रिया अजित पवार यांनी दिली.
If the cases of Omicron continue to increase like this, then we'll have to think: Deputy CM Ajit Pawar on being asked about the permission to Congress leader Rahul Gandhi's visit to Mumbai on Dec 28 pic.twitter.com/ejRwvXSJWv
— ANI (@ANI) December 9, 2021
करोनाच्या ओमायक्रॉन व्हेरिएंटचा शिरकाव देशात झाला असून सर्वाधिक रुग्ण महाराष्ट्रात आहेत. कालच नव्यानं १० ओमायक्रॉन बाधितांची नोंद करण्यात आल्याचं आरोग्यमंत्री राजेश टोपेंनी सांगितलं होतं. याच दरम्यान महाराष्ट्राची चिंता वाढवणारी आणखी एक बातमी समोर आली आहे. महाराष्ट्रात करोनाचा ‘आर काउंट’ १ च्या अगदी जवळ पोहोचला आहे. मुंबई-पुणे-ठाण्यात तर हा काउंट १पेक्षा पुढे गेलाय. आर व्हॅल्यू किंवा आर काउंट हा करोना पॉझिटिव्ह व्यक्तीच्या संपर्कात आल्याने संक्रमित झालेल्या लोकांची संख्या सांगते. सध्या, आर चा देशातील काउंट एकापेक्षा कमी आहे. परंतु काही मोठ्या शहरांमध्ये तो झपाट्याने वाढत आहे. ओमायक्रॉनचा धोका वाढत असताना आर काउंट वाढत आहे. कोणत्याही रोगाच्या प्रसाराच्या दराला री-प्रॉडक्शन नंबर म्हणजेच आर-व्हॅल्यू म्हणतात. एखादा आजार एखाद्या संक्रमित व्यक्तीद्वारे सरासरी किती लोकांमध्ये पसरू शकते, याची माहिती सांगणारा हा ‘आर’ क्रमांक असतो.