नॉट रिचेबल शिवसेना नेते एकनाथ शिंदे गुजरातमध्ये? सेनेचे नाराज आमदारही सोबत असण्याची शक्यता!

विधानपरिषद निवडणुकीचं मतदान पार पडल्यानंतर सोमवारी सायंकाळपासून शिवसेनेचे नाराज आमदार गायब आहेत. पक्षाकडून त्यांना संपर्क करण्याचा वारंवार प्रयत्न करण्यात येत आहे. मात्र अजूनही हे आमदार मुंबईतील कोणत्याही शिवसेना नेत्याच्या संपर्कात नसल्याचं सांगितलं जात आहे. त्यामुळे या नाराज आमदारांना घेऊन एकनाथ शिंदे नेमके गेले कुठे, असा प्रश्न उपस्थित झाला आहे. अशातच मंत्री शिंदे यांनी काही नाराज आमदारांसह थेट गुजरात गाठल्याची माहिती समोर येत आहे. विधानपरिषद निवडणूक मतदानात झालेल्या गोंधळानंतर एकनाथ शिंदे हे आपल्या समर्थक आमदारांसह राज्याबाहेर निघून गेल्याचे समजते. सध्या त्यांचा मुक्काम गुजरातमधील एका हॉटेलमध्ये असल्याची चर्चा आहे. मात्र अद्याप याबाबत अधिकृत माहिती मिळालेली नाही.

विधानपरिषदेच्या निकालात नेमकं काय झालं?

विधानपरिषद निवडणूक निकालात पहिल्या फेरीअखेर राम शिंदे (भाजपा) यांना ३०००, श्रीकांत भारतीय (भाजपा) यांना ३०००, एकनाथ खडसे (राष्ट्रवादी काँग्रेस) यांना २९००, प्रवीण दरेकर (भाजपा) यांना २९००, रामराजे नाईक निंबाळकर (राष्ट्रवादी काँग्रेस) यांना २७००, उमा खापरे (भाजपा) यांना २७००, सचिन अहिर (शिवसेना) यांना २६०० आणि आमश्या पाडवी (शिवसेना) यांना २६०० तर पाचव्या फेरीअखेर प्रसाद लाड (भाजपा) यांना २८५७ इतके मतमूल्य मिळून त्यांनी विजयासाठीचा कोटा पूर्ण केला.

दरम्यान, दहाव्या व शेवटच्या फेरीअखेर भाई जगताप (भारतीय राष्ट्रीय काँग्रेस) यांना २४७४ इतकी मतमूल्य तर चंद्रकांत हंडोरे (भारतीय राष्ट्रीय काँग्रेस) यांना २२०० इतकी मतमूल्य मिळाली. या फेरीअखेर अधिक मतमूल्यांच्या आधारे भाई जगताप हे विजयी झाल्याचे निवडणूक निर्णय अधिकारी राजेंद्र भागवत यांनी जाहीर केले.