ठाणे | बदलापुरात कपड्याच्या दुकानात काम करणाऱ्या एका महिलेचं मंगळसूत्र भामट्याने लांबवल्याची घटना घडली आहे. आपण ज्वेलर्स व्यापारी असल्याचे सांगत या भामट्याने महिलेला गंडा घातला. ही घटना सीसीटीव्ही कॅमेरात कैद झाली आहे.
तुमच्या गळ्यातलं मंगळसूत्र सुंदर आहे…
बदलापूर पश्चिमेच्या बेलवली परिसरात दुर्गा कलेक्शन नावाचं महिलांच्या कपड्यांचं दुकान आहे. या दुकानात इंदू उतेकर या महिला काम करतात. शुक्रवारी संध्याकाळी त्या दुकानात असताना एका व्यक्तीने दुकानात येत ड्रेस दाखवण्यास सांगितलं. दाखवलेल्या ड्रेसपैकी दोन ड्रेस पसंत करून त्याने दुकानमालक दिपाली महाले यांना कॉल केला आणि किंमत कमी करून घेतली. त्यानंतर या इसमाने इंदू उतेकर यांना ‘तुमच्या गळ्यातलं मंगळसूत्र सुंदर आहे, मी सोन्याचा व्यापारी असून माझी ३ दुकानं आहेत. मला हे मंगळसूत्र द्या, मी त्याचा छापा मारून काही वेळात तुम्हाला परत आणून देतो’, असे सांगितलं.
विश्वास नसेल तर माझ्या हातातलं सोन्याचं कडं तुमच्याकडे ठेवा…
मात्र, इंदू यांनी त्याला नकार देताच ‘मी तुमच्या दुकानाच्या मालक दीपाली महाले यांच्या ओळखीचा असून तुमच्या दुकानात सीसीटीव्ही कॅमेरासुद्धा आहे. त्यामुळे तुम्ही माझ्यावर विश्वास ठेवा, आणि विश्वास नसेल तर माझा मोबाईल नंबर आणि माझ्या हातातलं सोन्याचं कडं तुमच्याकडे ठेवा’, असं म्हणत त्यांना इंदू उतेकर यांचा विश्वास संपादन केला. त्यामुळे इंदू यांनी त्यांचं मंगळसूत्र या भामट्याकडे दिलं.
त्यानंतर हा भामटा त्याच्या साथीदाराच्या दुचाकीवर बसून निघून गेला, तो परत आलाच नाही. त्यामुळे आपली फसवणूक झाल्याचे इंदू उतेकर यांना लक्षात आल्याने त्यांनी बदलापूर पश्चिम पोलीस ठाण्यात धाव घेत तक्रार केली. याप्रकरणी पोलिसांनी गुन्हा दाखल केला असून या भामट्याचा सध्या शोध सुरू आहे.
