आयुक्त इक्बालसिंग चहल यांची अमेरिकेत मालमत्ता; भाजप नेत्याचा धक्कादायक आरोप
![Property of Commissioner Iqbal Singh Chahal in US; Shocking allegation of BJP leader](https://mahaenews.com/wp-content/uploads/2022/03/Ekbalshihchahal-mumbai.jpg)
मुंबईः महापालिकेचे माजी स्थायी समिती अध्यक्ष यशवंत जाधव यांच्या बेहिशेबी मालमत्तांच्या प्रकरणात आता पालिका आयुक्त इक्बालसिंग चहल हेही लक्ष्य ठरले आहेत. प्राप्तिकर विभागाने चहल यांना १० मार्च रोजी चौकशीसाठी उपस्थित राहण्यास सांगितल्याचे आता समोर आले आहे. यावर आता भाजप नेते मोहित कंबोज यांनी चहल यांच्यावर मोठे आरोप केले आहेत.
इक्बाल सिंग चहल यांनी अमेरिकेत मालमत्ता खरेदी केली असून त्याबाबतची माहिती येत्या आठवड्याभरात आयकर विभागाला देणार असल्याचा आरोप मोहित कंबोज यांनी केला आहे. पटेलपासून फिल्मस्टारपर्यंतचं वसुलीचं रॅकॅटे सुरू होतं. त्याची माहिती आम्ही देणार आहोत, असंही कंबोज यांनी म्हटलं आहे.
तसंच, आजपर्यंतच्या इतिहासात महापालिका आयुक्तांना आयकर विभागाने नोटीस पाठवली नाही. स्थायी समितीच्या अध्यक्षांच्या भ्रष्टाचारावर नोटीस दिली नाही. यशवंत जाधव यांची २२ महिन्यात ३६ मालमत्ता बनवल्या. ३६० कोटींचा घोटाळा त्यांनी केला. स्थायी समितीत जेवढे प्रस्ताव जातात. त्याचा अजेंडा आयुक्त लावतात. स्थायी समितीचा अजेंडा सेट करण्याचं काम आयुक्ताचं आहे. त्यामुळे जाधव यांनी केलेल्या भ्रष्टाचारात आयुक्तांना किती कट मिळाला? त्याची चौकशी का केली नाही? त्यांना चौकशीच्या फेऱ्यात का घेतलं नाही? त्यांच्या परवानगी शिवाय भ्रष्टाचार होऊच शकत नाही, असा आरोपही कंबोज यांनी केला आहे.
चहल यांचे स्पष्टीकरण
या नोटिशीसंबंधी पालिका आयुक्त चहल स्पष्टीकरण दिले आहे. ‘प्राप्तिकर विभागाची नोटीस आली होती. पण त्यांना महापालिकेच्या कार्यव्यवस्थेनुसार योग्य त्या स्तरावर उत्तर देण्यात आले आहे. मी त्या कार्यालयाला भेट दिलेली नाही’, असे चहल यांनी स्पष्ट केले आहे.