मुंबई | प्रतिनिधी
पनवेल येथील एका व्यावसायिकाला १.१५ कोटी रुपयांची वीजचोरी केल्याप्रकरणी अटक करण्यात आली आहे. महत्त्वाचे म्हणजे याच व्यावसायिकाला गेल्या आठवड्यात १.३० कोटी रुपयांच्या वीजचोरीप्रकरणी दंड ठोठावण्यात आला होता. जियाउद्दीन पटेल असे आरोपीचे नाव असून त्याचा स्टोन क्रशिंगचा व्यवसाय आहे. पटेलने कमी रीडिंग दाखवण्यासाठी विद्युत ऊर्जा मीटरमध्ये छेडछाड केल्याचा आरोप आहे. आरोपीच्या स्टोन क्रशिंग युनिटमध्ये चोरी झाल्याचे लक्षात आल्यानंतर महावितरणने त्याच्या दुसऱ्या युनिटवरही छापा टाकला.
पनवेल महानगर पोलीस ठाण्यात पटेल आणि त्याच्या दोन साथीदारांविरुद्ध दुसरा एफआयआर दाखल करण्यात आला आहे, अशी माहिती पोलिसांनी दिली. दरम्यान, मीटर रीडिंगमधील अनियमिततेविरूद्ध मोहीम सुरू ठेवणार असल्याचे अधिकाऱ्यांनी सांगितले.
वीजचोरीची प्रकरणे केवळ राज्यातच नाही, तर देशातही मोठ्या प्रमाणात घडत आहेत. या वर्षाच्या सुरुवातीस हरियाणातील पॉवर युटिलिटीजच्या अधिकार्‍यांनी राज्यातील पाच शहरे आणि शहरांमधील उद्योग आणि व्यावसायिक प्रतिष्ठानांवर छापे टाकत वीजचोरीची जवळपास २५०० प्रकरणे शोधून काढली होती. यापूर्वी २०२० मध्ये एका रात्रीत टाकलेल्या छाप्यात वीज विभागाचे तीन मुख्य अभियंते आणि पाच अधीक्षक अभियंत्यांसह नऊ अधिकारी कुंडी कनेक्शनद्वारे वीज चोरी करताना पकडले गेले होते. त्यांच्याकडून सात लाख रुपयांचा दंड ठोठावण्यात आला आहे.
