कबुतरखान्यांवरील बंदीविरोधात जैन समाज आक्रमक
कबुतरखान्यांवरील बंदीचा वाद चिघळला, जैन समाजाच्या मुनींची थेट धमकी
मुंबई : मुंबई उच्च न्यायालयाने कबुतरखान्याजवळ कबुतरांना खायला घालण्यावरील बंदी कायम ठेवल्यानंतर जैन समाज अधिक आक्रमक झाला आहे. न्यायालयाच्या आदेशाला न जुमानता, दादरमधील कबुतरखान्याजवळ जैन समाजातील काही लोकांनी कबुतरांना खायला घातले. पोलिसांनी तातडीने कारवाई करून त्यांना रोखले. यामुळे कबुतरखाना बंद करण्याच्या निर्णयाविरुद्ध १३ तारखेपासून उपोषण सुरू करण्याचा इशारा समुदायाने दिला आहे.
जैन मुनी नीलेशचंद्र विजय यांनीही यावर प्रतिक्रिया दिली आहे आणि म्हटले आहे की, ‘गरज पडल्यास आम्ही शस्त्र उचलू.’ कबुतरखान्याबद्दल बोलताना नीलेश चंद्र विजय म्हणाले की, आम्ही शांततापूर्ण पद्धतीने सत्याग्रह आणि उपोषण करू. जैन समाज शांतताप्रिय आहे आणि शस्त्र उचलणे आमचे काम नाही, परंतु गरज पडल्यास धर्माचे रक्षण करण्यासाठी आम्ही शस्त्र उचलू शकतो.
ते म्हणाले की, हे प्रकरण अजूनही न्यायालयात आहे आणि कबुतरांना मरता कामा नये. सरकारच्या आदेशानंतर पक्ष्यांना खायला घालण्यास सुरुवात झाली आहे. निवडणुका लक्षात घेऊन हे सर्व केले जात आहे. पर्युषण उत्सव संपल्यानंतर आम्ही पुढील निर्णय घेऊ. आम्ही आता शांत बसणार नाही. आम्ही १३ तारखेपासून उपोषण सुरू करू. देशभरातील जैन बांधव येथे धरणे धरतील. जीवन आपल्या धर्मात आहे, मग जैन धर्माला लक्ष्य का केले जात आहे? मी एकटा धरणे धरणार नाही. देशभरातील १० लाख जैन बांधव येथे उपोषणाला बसतील.
हेही वाचा : ‘विधानसभेआधी दोन व्यक्तींनी १६० जागा जिंकून देण्याची गॅरंटी दिली’; शरद पवार यांचा मोठा गौप्यस्फोट
जैन मुनी नीलेशचंद्र विजय म्हणाले की, दारू पिऊन आणि कोंबडी खाल्ल्याने किती लोकांचा मृत्यू होतो हे देखील दाखवले पाहिजे. आम्ही कबुतरांना खायला घालण्याची परवानगी पालिकेकडे मागितली आहे. आमच्या धर्मात असे लिहिले आहे की मुंग्यांपासून हत्तीपर्यंत कोणताही सजीव प्राणी मरू नये. त्यांच्या या विधानामुळे नवा वाद निर्माण होण्याची शक्यता आहे. आता मनसे आणि ठाकरे गट यावर काय भूमिका घेतात याकडे सर्वांच्या नजरा लागल्या आहेत.
दुसरीकडे राज्यात कबुतरखान्यावरून सुरू असलेले राजकारण थांबण्याचे नाव घेत नाही आहे. जैन समाजानंतर आता मराठी समाजही रॅली आणि निषेध करणार आहे. दादर कबुतरखान्याच्या मुद्द्यावर मराठी एकता समितीने निषेध जाहीर केला आहे. दादर कबुतरखाना बंद करण्यात आला आहे आणि तो कायमचा बंदच राहिला पाहिजे, अशी घोषणा मराठी एकता समितीने केली आहे. काही लोक कायद्याचे उल्लंघन करत आहेत. पोलिसांना धक्का देत आहेत. चाकू आणि बंदुका यांसारखी शस्त्रे आणून सरकारी मालमत्तेचे नुकसान करत आहेत, असा समितीचा आरोप आहे.
समितीचे म्हणणे आहे की, असे लोक न्यायालयाचा अवमान करतात. नागरिकांचे आरोग्य धोक्यात आणतात आणि जबरदस्तीने कबुतरखाना पुन्हा सुरू करतात. या सर्व लोकांवर कारवाईची मागणी करणारे निवेदन सरकारला सादर करतील असा इशारा संघटनेने दिला आहे. घटनेच्या दिवशी पोलिसांनी कोणतीही कारवाई का केली नाही, असा प्रश्नही समिती विचारेल. भविष्यात असे आंदोलन किंवा अडथळे निर्माण झाल्यास, लाखो लोकांसह रॅली देखील काढली जाईल, असे समितीने स्पष्ट केले. या संदर्भात १३ ऑगस्ट रोजी सकाळी १० वाजता दादर कबुतरखाना येथे मोठ्या संख्येने स्थानिक मराठी लोक एकत्र येतील. जिथून सरकारला निवेदन सादर केले जाईल.
