मुंबई | अपक्ष खासदार नवनीत राणा आणि शिवसेना खासदार संजय राऊत यांच्यातला संघर्ष काही थांबायला तयार नाही. नवनीत राणा यांनी काल नागपूर पोलिस आयुक्तांना सनसनाटी पत्र लिहून राऊतांविरोधात अनेक धक्कादायक आरोप केले होते. आज त्यांनी थेट दिल्ली पोलीस आयुक्तांना पत्र लिहून राऊतांविरोधात पुन्हा नवे आरोप केले आहेत. मी मागासवर्गीय समाजाची असल्याने मला जाणून बुजून ४२० (चार सौ बीस) म्हणाले, असा आरोप नवनीत राणा यांनी दिल्ली पोलिसांना लिहिलेल्या पत्रात केला आहे.
नवनीत राणा यांनी संजय राऊत यांच्याविरोधात दिल्ली पोलिसांकडे तक्रार केलीय. मी मागासवर्गीय जातीची असल्याने संजय राऊत मला जाणून बुजून टार्गेट करतात. विविध वृतवाहिन्यांवर माझी बदनामी होईल, असे बाईट ते देत असतात. मी चांभार जातीची असल्याने त्यांसंदर्भाने माझी शक्य तितकी बदनामी राऊत करत आहेत. त्यामुळे खासदार राऊतांविरोधात सक्त कारवाई करा, अशी मागणी राणांनी दिल्ली पोलिस आयुक्तांना पत्र लिहून केली आहे.
माझे पती आणि मी दोघेही राजकारणात आहोत. आमच्या दोघांचीही बदनामी करण्याच्या हेतून ते वारंवार आम्हाला बंटी बबली म्हणून हिणवत असतात. तसेच माझ्या समाजाला बदनाम करण्यासाठी ते ४२० बोलतात, हे सगळं प्रकरण धक्कादायक असल्याने दिल्ली पोलिसांनी यामध्ये लक्ष घालून राऊतांविरोधात कारवाई करावी, असं राणा यांनी पत्रात म्हटलं आहे.
नवनीत राणा यांचं नागपूर पोलिसांना पत्र
“शिवसेनेचे नेते खासदार संजय राऊत हे माझ्याविरोधात आकसापोटी बोलत आहेत. मी मागासवर्यीय असल्याने वारंवार मला टार्गेट करत आहेत. मी चांभार जातीची आहे, हे त्यांना माहिती असताना सुद्धा मला प्रसारमाध्यमांवर बाईट देताना हिणवून बोलत आहेत. मागील दोन दिवसांत ज्यांनी विविध वृत्तवाहिन्यांना ज्या मुलाखती दिल्या त्या मुलाखतीमध्ये त्यांनी मला व माझ्या पतीला दृष्ट हेतूने तसेच समाजात माझी बदनामी करण्याच्या उद्देशाने वारंवार बंटी बबली म्हणून संबोधलं. तसेच मला ४२० सुद्धा म्हटलं. राऊतांच्या चिथावणीवरुन त्यांचे कार्यकर्ते मला मारण्याची भाषा सुद्धा बोलत होते.”
“त्यांनी माझ्याकरिता रुग्णवाहिका सुद्धा आणून ठेवली होती. असे करुन खासदार संजय राऊक यांनी एका मागासवर्गीय चांभार जातीच्या महिलेला तिच्या घरातून बाहेर पडण्यास मज्जाव केला एवढंच नाही तर घराच्या बाहेर निघाल्यास मारण्याची धमकी दिली. तसंच संजय राऊत यांनी टीव्ही चॅनेल्सवर येऊन २० फूट खाली जमिनीत गाडून टाकू, आमच्या नादाला लागण्याअगोदर स्मशानात गोवऱ्या रचून या, अशी धमकी दिली. असे करुन त्यांनी चांभार जातीच्या महिलेवर अत्याचार केला. संजय राऊत हे ओबीसी प्रवर्गात येतात. ते अनुसूचित जाती आणि जमाती प्रवर्गात येत नाहीत. त्यांच्यावर अॅट्रोसिटी अंतर्गत कारवाई करण्यात यावी”, असं सनसनाटी पत्र राणांनी नागपूर पोलिसांना लिहिलं होतं.
