मुंबईच्या मध्यवर्ती कारागृहातील कैद्याला करोनाची लागण झाली. या कैद्याला हाताळणाऱ्या दोन शिपायांनाही लागण झाल्याचे समजते. या कैद्याबरोबर आणखी दीडशे कैदी कारागृहातील कक्षात बंद होते. त्यामुळे कारागृह विभागासह गृहमंत्रालयाने ही बाब गांभीर्याने घेतल्याचे समजते.
आर्थर रोड कारागृहात आठशे कैदी ठेवण्याची क्षमता आहे. टाळेबंदीआधी येथे सुमारे ३४०० कैदी होते. करोनाचा प्रादुर्भाव वाढणार हे लक्षात घेऊन मुंबई विभागातील आर्थर रोड, भायखळा (महिला), ठाणे, कल्याण येथील कारागृहातील काही कैदी तळोजा कारागृहात हलविण्यात आले.
