खासदार बारणेंना चिन्ह सोडावे लागणार? मावळ मतदार संघावर भाजपाचा दावा!

पिंपरी । विशेष प्रतिनिधी

भाजपाने मावळ लोकसभा जागेवर जोरदार दावा केला आहे. भाजपा ‘हायकमांड’कडे मावळची जागा भाजपला देण्याची मागणी केली आहे. कर्जत येथील बैठकीत भाजपच्या पदाधिकाऱ्यांनी गोव्याचे मुख्यमंत्री सावंत यांच्यासमोर मावळमधून भाजपाला जागा देण्याची जोरदार मागणी केली आहे. त्यामुळे खासदार बारणे यांना ‘धनुष्यबाण’ चिन्ह सोडून, ‘कमळ’ चिन्हावर लढावे लागण्याची शक्यता आहे.

शहर भाजपाचे वरिष्ठ उपाध्यक्ष व प्रवक्ते राजू दुर्गे म्हणाले की, मावळची जागा भाजप हायकमांडकडे मागितली आहे. शंकर जगताप, बाळासाहेब भेगडे, प्रशांत ठाकूर, बाळासाहेब पाटील हे भाजपचे तगडे उमेदवार आहेत. हायकमांडच्या आदेशाचे पालन केले जाईल, ही जागा भाजपा सहज जिंकू शकते. आम्हाला आमच्या हायकमांडकडे मागणी करण्याचा अधिकार आहे. मात्र, महायुतीचा जो अंतिम उमेदवार असेल, त्याला विजयी करण्यासाठी आम्ही सर्व शक्तीनिशी प्रयत्न करू. पक्षप्रमुखांचा निर्णय आमच्यावर बंधनकारक आहे, असेही दुर्गे यांनी म्हटले आहे.

भाजपाचे ज्येष्ठ नेते व माजी प्राधिकारी सदाशिव खाडे म्हणाले की, मावळात शिंदे शिवसेनेकडे मजबूत संघटन नाही. भाजपाचे सर्वाधिक आमदार आहेत. महापालिका, नगरपरिषद आणि नगर पंचायतींवर भाजपची सत्ता आहे. अशा स्थितीत या जागेवर भाजपाची 100 टक्के पकड आहे. कार्यकर्त्यांची मागणी आहे, त्यांची मागणी पक्षश्रेष्ठींपर्यंत पोहोचवणे आपले कर्तव्य आहे. चिंचवड, कर्जत, पनवेल, उरणमध्ये भाजपचे आमदार आहेत. अपक्ष सुरेश लाड हे भाजपशी संबंधित आहेत. लोणावळा, तळेगाव नगरपालिकेसह शेकडो नगरपंचायती व पंचायतींवर भाजपाचा ताबा आहे.

भाजपाच्या दाव्यांचे संख्यात्मक समीकरण…

भाजपाच्या कोअर कमिटीच्या बैठकीत मावळ लोकसभा मतदारसंघातून भाजपच्याच उमेदवाराने निवडणूक लढवण्याचा निर्णय घेतला आहे. सध्या गेली १० वर्षे अखंड शिवसेनेचे खासदार श्रीरंग बारणे आहेत. आता बारणे शिंदे शिवसेनेत आहेत. मावळमध्ये लोकसभेच्या सहा विधानसभेच्या जागा आहेत, असे भाजपा पदाधिकाऱ्यांचे म्हणणे आहे. त्यापैकी तीन आमदार भाजपचे आहेत. तसेच दोन नगरपालिका, अनेक नगर परिषदा आणि ग्रामपंचायतींवर भाजपाची सत्ता आहे. शिंदे यांच्या शिवसेनेचे संख्याबळ शून्य आहे. भाजपाचे कार्यकर्ते बूथ आणि पेज पातळीवर घरोघरी काम करत आहेत. भाजपाचे कार्यकर्ते अन्न शिजवून ताट दुसऱ्याला कसे देऊ शकतात? हे मुद्दे घेऊन पिंपरी चिंचवड शहर भाजपाचे काही पदाधिकारी दिल्लीत तळ ठोकून आहेत. मावळची जागा भाजपाला द्यावी आणि कोणत्याही उमेदवाराच्या नावाला मान्यता द्यावी, अशी मागणी भाजपा हायकमांडकडे केली असून, त्याला निवडून आणण्याची जबाबदारी भाजपाचे पदाधिकारी व कार्यकर्ते घेत आहेत.

खासदार श्रीरंग बारणेची ‘हॅट्ट्रिक’ अडचणीत…

मावळ लोकसभा जागेसाठी भाजपाची जोरदार मागणी गल्लीपासून दिल्लीपर्यंत पोहोचू लागली आहे. अशा स्थितीत विद्यमान खासदार श्रीरंग बारणे यांची जागा धोक्यात येताना दिसत आहे. बारणे यांचा तिसऱ्यांदा संसदेत पोहोचण्याचा प्रयत्न अडचणीत आल्याचे दिसत आहे. आता भाजपाची हायकमांड लाखो कार्यकर्त्यांच्या भावनांकडे लक्ष देते की नाही हे पाहायचे आहे. यावेळीही श्रीरंग बारणे हॅट्ट्रिक करण्यात यशस्वी होतो की नाही हेही पाहावे लागेल. मात्र, मावळच्या जागेबाबत श्रीरंग बारणे एवढेच सांगतात की, आम्ही सर्वस्व मुख्यमंत्री एकनाथ शिंदे यांच्यावर सोडले आहे, त्यामुळे मला कशाचीही चिंता नाही.