श्रीकांत शिंदेंसाठी मनसेने कंबर कसली, राज ठाकरेंची तोफ पुन्हा धडाडणार!

डोंबिवली: महायुतीचे उमेदवार म्हणून ठाण्यातून शिंदेंच्या शिवसेनेचे प्रवक्ते नरेश म्हस्के आणि कल्याणमधून विद्यमान खासदार श्रीकांत शिंदे यांना अधिकृत उमेदवारी जाहीर झाली आहे. उमेदवारी जाहीर झाल्यानंतर या दोघांनी शिवतीर्थ या निवासस्थानी जाऊन मनसे अध्यक्ष राज ठाकरे यांची भेट घेतली. मनसे आमदार राजू पाटील डोंबिवलीत खासदार शिंदे यांच्या करता खास मनसे मेळावा ठेवला होता. दरम्यान येत्या १२ मे ला कल्याण डोंबिवली येथे राज ठाकरे मनसे अध्यक्ष राज ठाकरे यांची सभा होणार आहे. या सभेला खासदार श्रीकांत शिंदे आणि मुख्यमंत्री एकनाथ शिंदे उपस्थित राहण्याची शक्यता आहे, अशी माहिती मनसेचे नेते बाळा नांदगावकर यांनी दिली आहे.

राज ठाकरे यांच्याभेटी नंतर खा. श्रीकांत शिंदे म्हणाले की, आज नरेश म्हस्के आणि माझी उमेदवारी अधिकृतरित्या जाहीर झाली. त्यानंतर राज ठाकरेंचा आशीर्वाद घेण्यासाठी आम्ही त्यांची भेट घेतली त्यांनी आम्हाला भरभरुन आशीर्वादही दिला. येणाऱ्या काळात ठाणे आणि कल्याण लोकसभेसाठी त्यांची सभा देखील होईल, त्यांचं सहाकार्य पहिल्यापासून आहे. प्रेम आहे. मनसे आता ठरवेल की राज ठाकरेंच्या किती सभा घ्यायच्या. पण त्यांच्या सभेनं प्रचाराला दिशा देण्याचं काम राज ठाकरे करतात. राज ठाकरेंचे विचार ऐकण्यासाठी सर्वाधिक तरुण पिढी पुढे येते. त्यांचे विचार ऐकण्यासाठी आम्ही देखील इच्छुक आहोत, आमचे मतदार नागरिकही आहेत. राज ठाकरेंनी महायुतीकडं कुठलीही अपेक्षा न करता त्यांनी मोठ्या मनानं पाठिंबा दिला आहे. मनसेचे कार्यकर्ते हे आधीच कामाला लागले आहेत. पण आता राज ठाकरेंच्या प्रचारानं मोठी ताकद महायुतीच्या उमेदवारांच्या मागे उभी करतील.

मनसे अध्यक्ष राज ठाकरे यांनी देशाचे पंतप्रधान नरेंद्र मोदी आणि महाराष्ट्रातील महायुतीच्या सरकारला बिनशर्त पाठिंबा दिला आहे. यानंतर कल्याण लोकसभेतील महायुतीचे उमेदवार खासदार श्रीकांत शिंदे यांच्यासाठी मनसेने कंबर कसली असून खासदार शिंदे यांच्यासाठी डोंबिवलीत मनसे आमदार राजू पाटील हे स्वतः मेळावा घेतला. कल्याण लोकसभेत मनसेचे जवळपास दीड लाख मतदार असून हे मतदान महायुतीचे उमेदवार श्रीकांत शिंदे यांच्या पारड्यात पडण्यासाठी हा मेळावा भरवला. यावेळी खासदार शिंदे आणि मनसे आमदार राजू पाटील हे मनसेचे पदाधिकारी, कार्यकर्ते यांच्याशी संवाद साधला. आता १२ मे च्या सभेत राज ठाकरे काय बोलणार याकडे सर्वांचं लक्ष लागलं आहे.