राज्यात पुढील 24 तासांत मुसळधार
![Rain forecast with thunderstorms for the next two-three days in some parts of the state](https://mahaenews.com/wp-content/uploads/2021/04/iStock-547033564.jpg)
रत्नागिरी – यंदा महाराष्ट्रात समाधानकारक पाऊस झाला आहे. याशिवाय सोमवार आणि आज मंगळवारीही पावसाची संततधार सुरु आहे. कर्नाटकात निर्माण झालेल्या कमी दाबाच्या पट्ट्यामुळे महाराष्ट्रातही पावसाचा प्रभाव राहणार आहे. यामुळे महाराष्ट्रातील कोकण, मराठवाडा, मध्य महाराष्ट्रात मुसळधार ते अतिमुसळधार पावसाची शक्यता असल्याची माहिती प्रादेशिक हवामान खात्याने दिली आहे. यानुसार राज्यातील पालघर, ठाणे, नवीमुंबई, मुंबई, रायगड, नंदूरबार, धुळे, जळगाव, नाशिक येथे येत्या 24 तासात मुसळधार ते अतिमुसळधार पावसाची शक्यता वर्तवण्यात आली आहे.
राज्यातील मध्य महाराष्ट्रासह, मराठवाडा आणि कोकण प्रदेशात कमी दाबाचा पट्टा निर्माण झाला असून आजही दिवसभर कोकणात पाऊस असणार आहे. यामध्ये विषेशत: उत्तर कोकणात पावसाचा प्रभाव अधिक असणार आहे. तसेच उत्तर महाराष्ट्रात म्हणजेच धुळे, नंदुरबार, जळगाव, पुणे, अहमदनगर या जिल्ह्यात कमी दाबाच्या पट्ट्याचा प्रभाव दिसणार आहे. पावसामुळे याभागात काही ठिकाणी मुसळधार अनेक ठिकाणी अतिमुसळधार स्वरूपाचा पाऊस होण्याची शक्यता वर्तवण्यात आली आहे.
दरम्यान, मराठवाडा परिसरात मुसळधार पाऊस सुरु आहे. या परिसरातील नद्यांच्या पाणीपातळीत वाढ झाली आहे. मात्र हवामाव खात्याच्या अंदाजानुसार मराठवाड्यात येत्या चार ते पाच दिवसात पावसाचा जोर कमी होईल मात्र पावसाची संततधार कायम असणार आहे.