देशातील कोरोनाबाधितांची संख्या 1,00,55,560 वर
![The number of corona victims in the country is 1,00,55,560](https://mahaenews.com/wp-content/uploads/2020/06/coronavirus-e-chernobyl.jpg)
- 24 तासांत 24,337 नवे रुग्ण
नवी दिल्ली – देशात आज सलग आठव्या दिवशी कोरोनाच्या नव्या रुग्णांची संख्या 30 हजारांपेक्षा कमी आहे. मात्र एकूण कोरोनाबाधितांची संख्या 1 कोटीच्या पार गेल्याने चिंता प्रचंड वाढली आहे. त्यामुळे नागरिकांनी आपापली काळजी घेणे आवश्यक आहे. देशात मागील 24 तासांत 24,337 नव्या कोरोना रुग्णांची नोंद झाली असून 333 कोरोना रुग्णांनी आपला जीव गमावला आहे. यासह देशाची एकूण कोरोना रुग्णसंख्या आता 1,00,55,560 वर पोहोचली आहे, तर कोरोनाबळींचा आकडा 1,45,810 इतका झाला आहे. तसेच आरोग्य मंत्रालयाने दिलेल्या माहितीनुसार, काल दिवसभरात 25,709 जण कोरोनामुक्त झाल्याने देशात आतापर्यंत 96,06,111 व्यक्तींनी कोरोनावर यशस्वी मात केली असून सध्या 3,03,639 जण कोरोनावर उपचार घेत आहेत.
दरम्यान, गेल्या काही महिन्यांपासून कोरोनाचा संसर्ग वाढत असल्याने केंद्र सरकारकडून लॉकडाऊनची कडक अंमलबजावणी करण्यात आली. त्यानंतर अर्थव्यवस्था रुळावर आणण्यासाठी सुरू करण्यात आलेल्या अनलॉकच्या काळात रुग्णसंख्येने मोठी उसळी घेतली होती. मात्र आता दिवसेंदिवस दिवसभरातील रुग्णसंख्या घटताना दिसत असली तरी एकूण रुग्णसंख्या 1 कोटीच्या पार गेल्याने चिंता वाढली आहे. त्यातच देशात कोरोनाची दुसरी लाट येण्याची भीतीही वर्तविली जात आहे.