चीनला मोठा झटका, भारतानंतर अमेरिकेत TIKTOK वर बंदी…
वॉशिंग्टन : चीनला आणखी एक मोठा झटका बसलेला आहे. भारतानंतर अमेरिकेत TikTok वरही बंदी घालण्यात आलेली आहे. अमेरिकेचे राष्ट्राध्यक्ष डोनाल्ड ट्रम्प यांनी शुक्रवारी सांगितले की सुरक्षेचा धोका लक्षात घेता आम्ही TikTok बंदी घालत आहोत. एअरफोर्स वनवर पत्रकारांशी बोलताना ट्रम्प म्हणाले, ‘जिथपर्यंत TikTok चा प्रश्न आहे, आम्ही त्यावर बंदी घालतोय’. भारताने केलेल्या कारवाईनंतर अमेरिकेत चिनी अॅपवर बंदी घालण्याची मागणी जोर धरू लागलेली होती. अनेक खासदार आणि एजन्सींनी TikTokवर हेरगिरी आणि डेटा चोरीचा आरोप केला आहे. ज्यानंतर आता अमेरिकेनेही TikTok बंदी घातलेली आहे.
यापूर्वी डोनाल्ड ट्रम्प यांनी स्पष्ट केले होते, आम्ही प्रत्येक गोष्टीवर लक्ष ठेवून आहोत. आम्ही TikTok वर बंदी घालू शकतो, तसेच आम्ही इतर काही पर्यायांवर विचार करीत आहोत. परंतु तो कोणत्या पर्यायांविषयी बोलत आहे हे त्यांनी स्पष्ट केलेले नाही. त्याचवेळी दोन प्रमुख अमेरिकन वृत्तपत्रांनी असा दावा केला आहे की, राष्ट्राध्यक्ष डोनाल्ड ट्रम्प यांनी राष्ट्रीय सुरक्षेचा हवाला देत बाइटडान्सला सांगितले, TikTok अमेरिकेच्या ऑपरेशन्सला देण्यात यावे. मायक्रोसॉफ्ट TikTok ची खरेदी करण्यासाठी सर्वात पुढे आहे. या दोन कंपन्यांमध्ये वाटाघाटीही सुरु झालेल्या आहेत. परंतु, दोघांनीही याला दुजोरा दिलेला नाही.