नाशिक | प्रतिनिधी
गेल्या आठवड्यापासून सुरू झालेले इंधनदरवाढीचे सत्र कायम राहून शुक्रवारपासून सलग तीन दिवस दोन्ही इंधनांचे दर वधारले आहेत.
पेट्रोल आणि डिझेलच्या दरांत सलग दुसऱ्या दिवशी वाढ झाली आहे. पेट्रोलमध्ये ५२ पैशांची वाढ होऊन ते ११४.२८ रुपयांवर, तर डिझेलमध्ये ५७ पैशांची वाढ होऊन ते ९७.०७ रुपयांवर पोहोचले आहे. २२ मार्चपासून पेट्रोलमध्ये तीन रुपये ८६ पैशांची, तर डिझेलमध्ये तीन रुपये ८८ पैशांची वाढ झाली आहे.
२२ मार्च रोजी पेट्रोल ८६ पैशांनी वाढून ११.२८ रुपयांवर गेले, तर डिझेलमध्येही ८५ पैशांची वाढ होऊन ते ९४.०४ रुपयांवर पोहोचले होते. त्यानंतर दुसऱ्या दिवशी बुधवारीही पेट्रोलमध्ये ८४ पैशांची वाढ होऊन ते ११२.१२ रुपयांवर, तर डिझेलमध्ये ८३ पैशांची वाढ होऊन ते ९४.८७ रुपयांवर पोहोचले होते. गुरुवारी एक दिवस दरवाढ झाली नाही. मात्र, शुक्रवारी पुन्हा दोन्ही इंधनांचे दर प्रत्येकी ८३ पैशांनी वधारले. पेट्रोल ११२.१२ रुपयांवरून ११२.९५ रुपयांवर, तर डिझेल ९४.८७ रुपयांवरून ९५.७० रुपयांवर पोहोचले. त्यानंतर शनिवारी पुन्हा पेट्रोल ८१ पैशांनी वधारून ११३.७६ रुपयांवर, तर डिझेलमध्ये ८० पैसे वाढ होऊन ते ९६.५० रुपयांवर पोहोचले. त्यानंतर सलग तिसऱ्या दिवशी रविवारी पेट्रोलमध्ये ५२ पैशांची वाढ होऊन ते ११४.२८ रुपयांवर, तर डिझेलमध्ये ५७ पैशांची वाढ होऊन ते ९७.०७ रुपयांवर पोहोचले. गेल्या सहा दिवसांत पेट्रोलमध्ये ३ रुपये ८६ पैसे, तर डिझेलमध्ये ३ रुपये ८८ पैशांची वाढ झाली आहे. वाढीचा दर असाच राहिल्यास लवकरच डिझेल पुन्हा शंभरी गाठण्याची शक्यता आहे.
शहरातील रविवारचे दर
पेट्रोल : ११४.२८ प्रतिलिटर (वाढ ५२ पैसे)
डिझेल : ९७.०७ प्रतिलिटर (वाढ ५७ पैसे)
