मुंबई | कितीही हल्ला करा भ्रष्टाचाराची पोलखोल करणारच, भ्रष्टाचार करणारे अस्वस्थ आहेत, त्यामुळे अशा प्रकारचे हल्ले करतायेत. तोडफोड करुन आम्ही अभियान थांबवू, असं त्यांना वाटत असेल पण आमचं अभियान दुप्पट वेगाने सुरु ठेऊ, असा इरादा विरोध पक्षनेते देवेंद्र फडणवीस यांनी बोलून दाखवला. भाजपच्या पोलखोल रथाची तोडफोड झाल्यानंतर त्यांनी माध्यमांशी संवाद साधताना मुंबई महापालिकेतील सत्ताधारी सेनेवर हल्लाबोल केला.
मुंबई महापालिकेतील भ्रष्ट कारभाराची पोलखोल करण्यासाठी भाजपच्या पोलखोल अभियानाची आज सुरुवात होणार होती. तत्पूर्वी कालरात्री अज्ञातांनी रथाची तोडफोड करत नुकसान केलं. मुंबईतील चेंबूर कॅम्प इथल्या भाजपा कार्यालयातून रथयात्रेची सुरुवात होणार होती. परंतु रथयात्रेच्या आदल्या रात्री अज्ञातांनी रथाची तोडफोड केली. गुंडांना हाताशी धरुन सेनेने पोलखोल रथाची तोडफोड केल्याचा आरोप विधान परिषदेचे विरोधी पक्षनेते प्रवीण दरेकर यांनी केला. तर फडणवीसांनी याप्रकरणी सत्ताधाऱ्यांना लक्ष्य केलं.
कितीही हल्ले करा, भ्रष्टाचार बाहेर काढत राहू
भ्रष्टाचार करणारे अस्वस्थ आहेत. त्या अस्वस्थतेतून रात्रीचा हल्ला करण्यात आलाय. आम्ही मुंबई महापालिकेतील भ्रष्ट कारभाराची पोलखोल करणार, असं म्हणताच त्यांनी तोडफोड केली. मला एका गोष्टीचं समाधान आहे, आमचा घाव सत्ताधाऱ्यांच्या वर्मी बसला आहे. पण मला त्यांना सांगायचंय, कितीही हल्ला करा, आम्ही भ्रष्टाचाराची पोलखोल करतच राहू. खरं हिंदुत्व कुणाच्या रक्तात आहे, हे आता साऱ्यांना कळलं आहे, अशी आक्रमक शब्दात फडणवीसांनी सत्ताधारी शिवसेनेवर तोफ डागली.
नेमकं प्रकरण काय?
मुंबई महापालिकेतील भ्रष्ट कारभाराची पोलखोल करण्यासाठी भाजपच्या पोलखोल अभियानाची आज सुरुवात होणार होती. परंतु त्याआधी अज्ञातांनी रथाची तोडफोड करत नुकसान केलं. मुंबईतील चेंबूर कॅम्प इथल्या भाजपा कार्यालयातून रथयात्रेची सुरुवात होणार होती. विधानपरिषदचे विरोधी पक्षनेते प्रविण दरेकर यांच्या हस्ते आणि आमदार प्रसाद लाड यांच्या प्रमुख उपस्थितीत रथयात्रेची सुरुवात होणार होती. परंतु रथयात्रेच्या आदल्या रात्री अज्ञाताने रथाची तोडफोड केली.
रथाच्या तोडफोडीमागे सेनेचा हात, दरेकरांना संशय
गुंड प्रवृत्तीच्या लोकांना हाताशी धरुन भाजपची पोल खोल अभियान दाबण्याचा प्रयत्न सुरु आहे, असा आरोप दरेकर यांनी केला. शिवाय रथाच्या तोडफोडीमागे शिवसेनेचा हात असल्याचा संशय प्रविण दरेकर यांनी व्यक्त केला.
