होळी म्हणजे आनंदाचा, मांगल्याचा सण. या दिवशी प्रत्येकाच्या घरात उत्साहाचं वातावरण पसरलं असते. होळीची पुजा झाल्यानंतर साऱ्यांना वेध लागतात ते रंगपंचमीचे. रंगपंचमी म्हटलं की सामान्य नागरिकांपासून सेलिब्रिटींपर्यंत साऱ्यांमध्येच उत्साहाचं वातावरण पसरलं असतं. काही ठिकाणी खास होळी पार्टीचं आयोजनही करण्यात येतं. आपण सारेच जण हा दिवस आपल्या कुटुंबियांसोबत सेलिब्रेट करत असतो. मात्र मराठी अभिनेता, दिग्दर्शक रवी जाधवने त्याची यंदाची रंगपंचमी ‘स्पेशल’ सेलिब्रेट केली आहे.
रवी जाधवने यंदाची रंगपंचमी मित्रपरिवारासोबत सेलिब्रेट न करता ठाण्यातील आपल्या स्पेशल मित्रांसोबत साजरी केल्याचं पाहायला मिळत आहे. ठाण्यातील जिद्द या शाळेतील स्पेशल चाईल्डसोबत रवीने यंदा रंग खेळले आहेत. या रंगपंचमीचे काही फोटोही रवीने इन्स्टाग्रामवर शेअर केले आहेत.
रवीने शेअर केलेल्या फोटोमध्ये त्याच्यासोबत असलेली मुलं रंगपंचमीचा पुरेपूर आनंद घेताना दिसत आहेत. कोणी लाल, हिरव्या, पिवळ्या रंगात रंगलं आहे. तर कोणी आनंदाच्या रंगात न्हाऊन निघालं आहे. त्यामुळे रवीसोबत या मुलांनी रंगपंचमीचा चांगलाच आनंद लुटल्याचं एकंदरीत दिसून येत आहे.
सध्या रवीचे हे फोटो व्हायरल होत असून त्याने “अस्सल निरागस हसणे केवळ इथे पहायला मिळते. आमची ठाण्यातील ‘जिद्द’ शाळेतील ‘स्पेशल’ रंगपंचमी.कारण आपण सगळेच ‘स्पेशल’ आहोत!!!” , असं कॅप्शन रवीने या फोटोला दिलं आहे.
दरम्यान, रवीच्या या उपक्रमामुळे सध्या त्याच्यावर कौतुकांचा वर्षाव होत आहे. रवी जाधव मराठी चित्रपटसृष्टीतील एक नावाजलेलं नाव असून त्याने काही गाजलेल्या चित्रपटांच दिग्दर्शन केलं आहे. त्याचा न्यूड हा चित्रपट बॉक्स ऑफिसवर तुफान गाजला होता.
