बिग बॉस ओटीटी सीजन ३ मध्ये वडापाव गर्ल चंद्रिका दीक्षितची एन्ट्री

मुंबई : बिग बॉस ओटीटी ३ सीजन २१ जूनपासून सुरू झाला आहे. या सीनजमध्ये अनेक सोशल मीडिया स्टार्स स्पर्धक म्हणून आले आहेत. बिग बॉसच्या घरात आलेल्या १६ स्पर्धकांपैकी सोशल मीडियावर व्हायरल झालेल्या एका स्पर्धकाची मोठी क्रेझ आहे. ही स्पर्धक आहे वडापाव गर्ल अर्थात चंद्रिका गेरा दीक्षित. बिग बॉसच्या घरात पहिल्याच दिवशी तिच्या कमाईचा खुलासा तिने केला आहे.

चंद्रिका दीक्षितने दिल्लीत वडापाव गर्ल म्हणून लोकप्रिय आहे. ती मागील अनेक काळापासून दिल्लीत मंगोलपुरी भागात वडापावची गाडी लावत होती. त्यानंतर तिने तिचं वडापावचं दुकान सुरू केलं. आता बिग बॉसच्या घरात आल्यानंतर तिने तिची दिवसाला   कमाई किती आहे याबाबत सांगितलं आहे.

बिग बॉसच्या घरात गेल्यानंतर तिने ती दिवसाला ४० हजार रुपये कमावते असं सांगितलं. तिच्या दिवसाच्या कमाईचा आकडा ऐकून सर्वच स्पर्धक आश्चर्यचकीत झाले. वडापाव विकून माझी इतकी कमाई होते, असंही तिने सांगितलं. आपल्या कमाईबद्दल बोलताना तिने सोशल मीडियावर तिच्या आयुष्यातील घडामोडींबद्दल अर्थात तिने घेतलेल्या गाडी, मोबाईल, घरावरुन टीका केली जाते असंही ती म्हणाली. मात्र मी चांगले पैसे कमावत असेल तर मी स्वत:साठी चांगल्या वस्तू घेऊ शकते, मी कमावत असलेले पैसे कसे, कुठे खर्च करायचे याचा मला हक्क आहे, असंही ती म्हणाली.

बिग बॉसच्या घरात येण्याआधी चंद्रिकाने एका मुलाखतीत तिला अनेकजण अनेकदा ती अतिशय उद्धट समजतं असल्याचं म्हटलं. बिग बॉसमध्ये येण्यामागचा उद्देश हाच आहे, की जे लोक मला उद्धट समजतात त्यांना माझं व्यक्तीमत्व खरं कसं आहे, हे समजावं. लोकांना मला आतापर्यंत केवळ चिडताना, रागावताना पाहिलं आहे, पण त्या रागामागे काय कारण आहे, हे अद्याप लोकांना माहिती नाही, असं ती म्हणाली.

कोण आहे वडापाव गर्ल?
दिल्लीत वडापावची गाडी लावण्यापासून ते आता बिग बॉसच्या घरात पोहोचण्यापर्यंतचा चंद्रिका दीक्षितचा प्रवास सोपा नव्हता. ती वडापावची गाडी चालू करण्याआधी हल्दीराम कंपनीत काम करत होती. तिचे पती गेरा रॅपिडो कंपनीत काम करत होते. तिच्या मुलाला डेंग्यू झाला आणि त्याची काळजी घेण्यासाठी तिला करोना काळात नोकरी सोडावी लागली. तिच्या पतीनेही नोकरी सोडली आणि दोघांनी मिळून वडापावची गाडी टाकण्याचा विचार केला. काही दिवसांतच सोशल मीडियावर वडापाव गर्लचे व्हिडिओ मोठ्या प्रमाणात व्हायरल होऊ लागले. वडापाव खाण्यासाठी लोक दूरवरुन तिच्या गाडीवर पोहोचतात आणि आज ती सोशल मीडिया स्टार आहे.