…म्हणून गेला श्रीदेवीच्या हातून ‘बाहुबली’!
मुंबई: बाहुबली सिनेमात शिवगामीची भूमिका अभिनेत्री श्रीदेवीने केली असती तर ती कशी दिसली असती? करा, कल्पना करा. कारण खरंच ही भूमिका श्रीदेवीला मिळणार होती. पण मग असं काय झालं जे हा सिनेमा श्रीदेवीच्या हातून गेला?… याला स्वत: श्रीदेवीच जबाबदार आहे.
‘बाहुबली २’ सिनेमा सध्या बॉक्स ऑफिसवर धमाल करत आहे. या आणि याआधीच्या ‘बाहुबली १ : द बिगिनिंग’ मध्ये महाराणी शिवगामीच्या पात्राचं बाहुबली या पात्राइतकंच महत्त्व आहे. आपल्या हातांनी तान्ह्या बाहुबलीला वाचवणारी शिवगामी अभिनेत्री रम्या कृष्णाने साकारली आहे. महिष्मतीच्या महाराणीच्या या भूमिकेसाठी राजामौली आधी अभिनेत्री श्रीदेवीला घेणार होते. त्यासाठी त्यांनी श्रीदेवीशी संपर्कही साधला आणि श्रीदेवीलाही ही भूमिका खूप आवडली. पण या भूमिकेसाठी श्रीदेवीने इतकी मोठ्ठी रक्कम मागितले की निर्मात्यांना थोडा विचार करावा लागला.
या सिनेमासाठी आधीच खूप जास्त गुंतवणूक करण्यात आली होती, त्यामुळे श्रीदेवीची मागणी निर्मात्यांना पूर्ण करता आली नाही. त्यामुळे ही भूमिका रम्याला मिळाली आणि तिने आपल्या कसदार अभिनयाने ‘शिवगामी’चं सोनं केलं.