एकनाथ शिंदे २२ आमदारांसह सुरतमध्ये, नवी दिल्लीत अमित शाह नड्डांसह फडणवीस अ‍ॅक्शन मोडमध्ये

नवी दिल्लीत राजकीय घडामोडी वाढल्या
विधानपरिषदेच्या निवडणुकीपूर्वीच एकनाथ शिंदे नाराज असल्याच्या चर्चा सुरु झाल्या होत्या. शिवसेना वर्धापन दिनादिवशी देखील एकनाथ शिंदे यांनी भाषण केलं नसल्यानं भाजप आमदार नितेश राणे यांनी प्रश्न उपस्थित केले होते. विधानपरिषद निवडणुकीच्या मतदानाची प्रक्रिया पार पडल्यानंतर एकनाथ शिंदे यांच्यासह शिवसेनेचे आमदार सुरतकडे रवाना झाले. शिवसेना आमदार सुरतमध्ये पोहोचल्यानंतर नवी दिल्लीत देखील राजकीय घडामोडी वाढल्या आहेत. भाजपचे विरोधी पक्षनेते देवेंद्र फडणवीस दिल्लीत दाखल झाले आहेत. तर, अमित शाह आणि जे.पी.नड्डा यांच्यात बैठक होणार आहे.

एकनाथ शिंदे यांच्यासोबत असलेले आमदार
१. एकनाथ शिंदे – कोपरी
२. अब्दुल सत्तार – सिल्लोड, औरंगाबाद
३. शंभुराज देसाई – पाटण, साताराट
४. संदिपान भुमरे – पैठण, औरंगाबाद
५. उदयसिंह राजपूत – कन्नड, औरंगाबाद
६. भरत गोगावले – महाड, रायगड
७. नितीन देशमुख – बाळापूर, अकोला
८.अनिल बाबर – खानापूर-आटपाडी, सांगली
९.विश्ननाथ भोईर – कल्याण पश्चिम
१०. संजय गायकवाड – बुलडाणा
११. संजय रायमूलकर – मेहकर
१२. महेश शिंदे – कोरेगाव, सातारा
१३. शहाजी पाटील – सांगोला, सोलापूर
१४. प्रकाश आबिटकर – राधानगरी, कोल्हापूर
१५ संजय राठोड – दिग्रस, यवतमाळ
१६. ज्ञानराज चौगुले – उमरगा, उस्मानाबाद
१७. तानाजी सावंत – परांडा, उस्मानाबाद
१८. संजय शिरसाट – औरंगाबाद पश्चिम
१९. रमेश बोरनारे – वैजापूर, औरंगाबाद
२०. श्रीनिवास वनगा, पालघर
२१. राजकुमार पटेल, अपक्ष
२२. प्रदीप जैस्वाल, अपक्ष

एकनाथ शिंदे यांच्या नाराजीची कारणं
एकनाथ शिंदे यांचा पक्षात सन्मान होत नसल्याची चर्चा सुरु होती. एकनाथ शिंदे यांच्या मंत्रालयात हस्तक्षेप वाढला असल्याचं देखील म्हटलं जातंय. राज्यसभा निवडणुकीवेळी एकनाथ शिंदे संभाजीराजे छत्रपती यांना उमेदवारी मिळावी यासाठी प्रयत्न करत होते. ठाण्यात वरुण सरदेसाई यांचा हस्तेक्षप वाढला होता हे देखील एक कारण असल्याचं बोललं जातंय.

छगन भुजबळांशी संघर्ष, राज्यसभेला मत बाद, सुहास कांदेंही सुरतमध्ये
शिवसेना मंत्री एकनाथ शिंदे यांच्यासोबत सुरतला गेलेल्या आमदारांमध्ये नाशिकमधील शिवसेनेचे आमदारा सुहास कांदे यांचा देखील समावेश आहे. सुहास कांदे यांचं मत राज्यसभेला बाद झाल्यानं ते चर्चेत आले होते.