देवेंद्र फडणवीस मुख्यमंत्री तर होणार पण सत्तास्थापनेचा फॉर्म्युला कसा असेल, शिंदे गटाला काय मिळणार?
मुंबईः गेल्या दहा दिवसांपासून महाराष्ट्रात सुरू असलेल्या सत्तानाट्यातील पहिल्या अंकाचा शेवट बुधवारी रात्री मुख्यमंत्री उद्धव ठाकरे (uddhav thackeray resignation) यांच्या राजीनाम्याने झाला. या सत्तानाट्यातील पुढचा अंक आता भारतीय जनता पक्षाच्या सत्तास्थापनेच्या हालचालींनी सुरू झाला आहे. राज्यात नवीन सरकार स्थापन होणार असून या सरकारात कोण- कोण सहभागी असेल याची चाचपणी भाजपकडून करण्यात येत आहे. येत्या दोन- तीन दिवसांत देवेंद्र फडणवीस (Devendra Fadanvis) पुन्हा मुख्यमंत्रीपदाची शपथ घेऊ शकतात. मात्र, त्यापूर्वी सरकार स्थापन करण्यासाठी भाजपची रणनिती काय हे जाणून घेऊ.
महाराष्ट्र विधानसभेचे गणित
सरकार स्थापनेसाठी बहुमताचा आकडा गाठावा लागतो. राज्याच्या विधानसभेत २८८ जागा आहेत. एका सदस्याच्या मृत्यूमुळं हा आकडा २८७ इतका झाला आहे. अशात बहुमतासाठी १४४ आमदारांचं पाठबळ असणं आवश्यक आहे. भाजपकडे सध्या १०६ आमदार आहेत. तर, शिंदे गटातील आमदारांची संख्या ३९ असून १२ अपक्ष आमदारांनी भाजपला पाठिंबा दर्शवला आहे. त्याचबरोबर, बीवीएचे ३ आणि मनसेचा एक आमदारानेही समर्थन दिल्याच्या चर्चा आहेत. त्यामुळं भाजपकडे सध्या १६१ आमदारांचे पाठबळ आहे. तर, एकीकडे शिवसेनेचे १६, राष्ट्रवादीचे ५३, काँग्रेसचे ४४ आणि समाजवादी पक्षाचे २ आमदार आहेत. त्याव्यतिरिक्त एमआयएमचे २ आणि २ अपक्ष आमदारांचा पाठिंबा महाविकास आघाडीला आहे. विधानसभेतील या संख्याबळाचा आढावा घेतल्यास भाजप सहज सत्ता स्थापनेचा दावा करु शकते. येत्या दोन दिवसांत भाजपकडून राज्यपालांकडे सत्ता स्थापनेचा दावा केला जाऊ शकतो.
भाजपची पुढील रणनीती काय?
उद्धव ठाकरे यांच्या राजीनाम्यानंतर विधीमंडळात होणारी आज बहुमत चाचणी रद्द करण्यात आली आहे. त्यामुळं येत्या काही दिवसांत फडणवीस राज्यपालांना भेटून सत्ता स्थापनेचा दावा करु शकतात. भाजपा हा राष्ट्रीय पक्ष असल्याने राज्यपाल त्यांना सरकार बनवण्याचे आदेश देऊ शकतात. त्यामुळं देवेंद्र फडणवीस यांच्या मुख्यमंत्रीपदाचा मुहूर्त जवळ आला आहे.
शिंदेगटाला काय मिळणार?
एकनाथ शिंदे यांना भाजपकडून उपमुख्यमंत्री पदाची ऑफर मिळाल्याची चर्चा आहे. त्याचबरोबर मंत्रीमंडळात शिंदे गटातील आमदारांना महत्त्वाची खाती दिली जाण्याची शक्यता आहे. ठाकरे सरकारमध्ये मंत्री असलेल्या सर्व आमदारांना मंत्रीपदं दिली जाण्याची शक्यता आहे. त्यातबरोबर, शिंदे गटातील काही आमदारांनाही मंत्रीपदे मिळण्याची शक्यता आहेत.
शिंदे गटातील या नेत्यांना मंत्रीपदी वर्णी?
१. एकनाथ शिंदे (उपमुख्यमंत्री)
२. दादा भूसे पाटील
३. दीपक केसरकर
४. गुलाबराव पाटील
५. संदीपान भुमरे
६. उदय सामंत
७. शंभुराज देसाई
८. अब्दुल्ल सत्तार
९. राजेंद्र पाटील
१०. बच्चू कडू
११. प्रकाश आबिटकर
१२. संजय रायमुलकर
