पर्यटनाचा आनंद लुटण्यासाठी नदीवर गेलेल्या मामा-भाचीचा मृत्यू; घटनेनं परिसरात हळहळ
सिंधुदुर्ग : गोवा राज्यासह अन्य ठिकाणाहून पर्यटक मोठ्या प्रमाणात तिलारी नदी परिसरात आनंद लुटण्यासाठी येतात. मात्र हा पर्यटनाचा आनंद लुटताना झालेला थोडासा हलगर्जीपणाही जीवावर बेतण्याचा धोका असतो. कुडासे वानोशी परिसरात असाच प्रकार घडला असून नदीत बुडून दोन जणांनी आपला जीव गमावला आहे. तनिषा ठाकूर (वय १३) आणि विजय पालयेकर (वय ४५) अशी मृतांची नावे आहेत.
मिळालेल्या माहितीनुसार, तनिषा ठाकूर ही मूळची हरमल येथील असून ती सुट्टीनिमित्त ताळगाव येथे आपल्या मामाच्या गावी आली होती. विजय पालयेकर हे तनिषा आणि कुटुंबातील अन्य सदस्यांसह नदीवर गेले. मात्र पाण्याचा अंदाज न आल्याने दोघेही बुडू लागले. सदर घटना घडल्यानंतर परिसरातील लोकांनी तत्काळ धाव घेऊन तनिषा ठाकूर आणि विजय पालयेकर यांना पाण्यातून बाहेर काढलं. तसंच उपचारार्थ कासारवर्णे पेडणे येथील प्राथमिक आरोग्य केंद्रात दाखल केले. मात्र तेथे डॉक्टरांनी दोघांनाही मृत घोषित केलं आहे.
दरम्यान, मामा-भाचीच्या मृत्यूनंतर परिसरात हळहळ व्यक्त करण्यात येत असून याबाबत अधिक तपास गोवा पोलीस करत आहेत.
