२३ व्या वर्षी सहा बायकांचा दादला, २५ पोरांचा बाप, ४४ गुन्हे; पोलिसांनी ‘असा’ केला जेरबंद

संदीप भोसले हा सराईत गुन्हेगार असून त्याच्याविरुद्ध अहमदनगर, पुणे, सातारा, बीड व औरंगाबाद येथे दरोडा, जबरी चोरी, घरफोडी चोरी, बेकायदेशीररित्या हत्यार अशा प्रकारचे एकूण गुन्हे दाखल आहेत. तसेच अहमदनगरला एक, बीडला एक व पुणे एक असे तीन जिल्ह्यात तीन मोक्काअंतर्गत गुन्हे आहेत. दरोडा, दरोड्याची तयारी, जबरी चोरी, घरफोड्या, पोलिसांच्या रखवालीतून पळून जाणे अशा २६ गुन्ह्यात तो फरारी होता.

आरोपी भोसले याने अलीकडेच पारनेर तालुक्यात एक रस्ता लुटीचा गुन्हा केला होता. त्यामुळे पोलिस अधीक्षक मनोज पाटील यांनी स्थानिक गुन्हे अन्वेषण शाखेने गुन्हा तात्काळ उघडकीस आणून आरोपींना अटक करण्याबाबत सूचना दिल्या. त्यावरून स्थानिक गुन्हे अन्वेषण शाखेच्या पोलिसांनी मीलन उर्फ मिलिंद ईश्‍वर भोसले (वय २३, राहणार बेलगाव, तालुका कर्जत) यास ताब्यात घेऊन तपास केला. त्याच्याकडून मुद्देमाल मिळाला आणि आरोपी भोसले याची माहिती मिळाली.

स्थानिक गुन्हे अन्वेषण विभागाचे पोलीस निरीक्षक अनिल कटके यांनी त्यानुसार तातडीने शोध सुरू केला. पोलिस पथक रत्नागिरी जिल्ह्यातील पावस परिसरात जाऊन आरोपीचा शोध घेत असताना पथकास आरोपी विजय नारायण भोसले (राहणार वाहिरा, तालुका आष्टी, जिल्हा बीड) असा नावामध्ये बदल करून चांदुर (जिल्हा रत्नागिरी) येथील लाल रंगाच्या दगडाच्या खाणीमध्ये काम करीत आहे, अशी खात्रीशीर माहिती मिळाली. त्यानंतर पोलिसांनी वेषांतर करून या खाणीवर ट्रक ड्रायव्हर व शेत मजूर म्हणून तीन दिवस काम केले. आरोपीच्या राहण्याच्या ठिकाणाबाबत खात्री करून आरोपीच्या राहत्या ठिकाणी पहाटेच्या वेळी छापा घातला. पण पोलिसांची चाहूल लागताच संदीप भोसले पळून जाऊ लागला. पोलिसांनी त्याचा पाठलाग केला आणि त्याला ताब्यात घेतले. पकडल्यावर पोलिसांनी त्याला नाव व पत्ता विचारला असता त्याने त्याचे बनावट नाव विजय नारायण भोसले (रा.वाहिरा, आष्टी, बीड) असे सांगितले. त्यानंतर त्यास विश्‍वासात घेऊन कसून चौकशी केली असता त्याने त्याचे खरे नाव संदीप उर्फ संदीप्या ईश्‍वर भोसले (रा.बेलगाव, कर्जत) असे सांगितले. त्यास ताब्यात घेऊन चौकशी केली असता त्याने गुन्ह्यांची कबुली दिली. त्यानंतर स्थानिक गुन्हे अन्वेषण शाखेच्या पोलिसांनी पारनेर पोलीस ठाण्यात त्याला हजर केले.

संदीप भोसलेच्या ६ बायका, सुमारे २५ मुलं-मुली

संदीप ईश्‍वऱ्या भोसले याला सहा बायका असून सुमारे पंचवीस मुलं-मुली असा त्याचा संसार आहे. अनेक वर्षांपासून तो फरार होता. काही दिवसांपूर्वी स्थानिक गुन्हे शाखेच्या पोलिसांनी त्याला पकडण्याचा प्रयत्न केला होता. मात्र, तो पळून जाण्याचा यशस्वी झाला होता. त्याला पकडण्याची कामगिरी स्थानिक गुन्हे शाखेचे सहायक पोलिस निरीक्षक सोमनाथ दिवटे, पोलिस हवालदार सुनील चव्हाण, दत्ता हिंगडे, संदीवार, कॉन्स्टेबल सागर ससाणे व रणजीत जाधव यांनी केली आहे.