अलिबाग येथील 19 अवैध बंगलाप्रकरणी ठाकरे कुटुंबाच्या अडचणी वाढणार, माजी सरपंचाच्या अटकेनंतर सोमय्या यांचा दावा
मुंबई: महाराष्ट्रातील अलिबागमधील कोरलाई गावात माजी मुख्यमंत्री उद्धव ठाकरे यांच्या पत्नी रश्मी ठाकरे यांच्या नावावर अधिकृतपणे 19 बंगले बांधण्यात आले आहेत. मात्र जेव्हा त्यांच्यावर आरोप होऊ लागले तेव्हा ते पाडण्यात आले. असा आरोप भाजप नेते किरीट सोमय्या यांनी केला आहे. किरीट सोमय्या यांच्या तक्रारीनंतर या प्रकरणाचा तपास सुरू झाला. काही महिन्यांपूर्वी याप्रकरणी एफआयआरही नोंदवण्यात आला होता. सध्या या प्रकरणात एक मोठा अपडेट समोर आला आहे. त्यानुसार रेवदंडा पोलिसांनी कोरलाई गावचे माजी सरपंच प्रशांत मिसाळ याला अटक केली आहे. अलिबागमधील 19 बंगल्यांच्या बनावट कागदपत्रांच्या प्रकरणात पोलिसांनी ही मोठी कारवाई केली आहे. या प्रकरणी रेवदंडा पोलिस ठाण्यात फसवणूक व बनावट कागदपत्रे दाखल करण्यात आली. त्यानंतर मोठी कारवाई करत पोलिसांनी थेट माजी सरपंच प्रशांत मिसाळ यांना अटक केली.
या प्रकरणाची झळ ठाकरे कुटुंबापर्यंत पोहोचणार आहे
माजी खासदार किरीट सोमय्या यांच्या दावा मानला तर या प्रकरणात उद्धव ठाकरे आणि त्यांच्या पत्नी रश्मी ठाकरे यांचा थेट हात आहे. ठाकरे यांनीच माजी सरपंचावर दबाव आणला. त्यानंतर ठाकरे कुटुंबाचे नाव हटवण्यात आले. आता हे प्रकरण हळूहळू उद्धव ठाकरेंच्या मूळावर उठत आहे.
काय होतं प्रकरण?
किरीट सोमय्या यांच्या म्हणण्यानुसार, 2013-14 मध्ये उद्धव ठाकरे यांनी अन्वय नाईक यांच्याकडून साडेनऊ एकर जमीन आणि 19 बंगले खरेदी केले होते. ज्याला त्यांनी नंतर रश्मी ठाकरे यांचे नाव दिले. या जागा व बंगल्याचा मालमत्ता करही सन २०१३ पासून भरला जात आहे. मात्र, उद्धव ठाकरे यांनी निवडणूक लढवताना प्रतिज्ञापत्रात जमिनीचा उल्लेख केला असला तरी 19 बंगले दाखवले नाहीत. किरीट सोमय्या यांनी याबाबत आयकर विभाग आणि निवडणूक आयोगाकडे तक्रार केली होती.
यासंदर्भात उद्धव ठाकरे यांना चौकशीत जाब विचारला असता, त्यांनी मुख्यमंत्री असताना ग्रामपंचायतीवर दबाव आणून त्यांच्या नोंदीतून 19 बंगले काढून घेतले. सोमय्या म्हणाले की, ही फसवणूक आहे, जेव्हा ही घरे 2008 पासून बांधली गेली, ज्यात खरेदीची सर्व कागदपत्रे, मालमत्ता कराच्या पावत्या आहेत. लवकरच रश्मी ठाकरे आणि उद्धव ठाकरे यांचीही नावे तपासात पुढे येतील, असे सोमय्या म्हणाले.
