भारताचा न्यूझीलंडवर DLS नियमानुसार ४ धावांनी थरारक विजय; मालिकेत २-० ने घेतली आघाडी!
India vs New Zealand 2nd ODI | भारत आणि न्यूझीलंड यांच्यातील दुसऱ्या एकदिवसीय सामन्यात पावसाने वारंवार खो घातल्यानंतर भारताने डकवर्थ लुईस (DLS) नियमानुसार ४ धावांनी निसटता विजय नोंदवला. या विजयासह भारतीय संघाने पाच सामन्यांच्या मालिकेत २-० अशी भक्कम आघाडी मिळवली आहे. प्रथम फलंदाजी करताना न्यूझीलंडचा डाव ४१ षटकांत १३४ धावांवर आटोपला होता. प्रत्युत्तरात भारताने २६ षटकांत ७ बाद ११३ धावा केल्या असताना पुन्हा मुसळधार पाऊस आला. नियमानुसार २६ षटकांत भारताला विजयासाठी १०९ धावांची गरज होती, त्यामुळे भारत आवश्यक धावसंख्येपेक्षा ४ धावांनी पुढे असल्याने भारताला विजयी घोषित करण्यात आले.
पावसामुळे सामना उशिरा सुरू झाल्याने प्रत्येकी ४७ षटकांच्या करण्यात आलेल्या या सामन्यात, नाणेफेक जिंकून प्रथम गोलंदाजी करताना भारतीय गोलंदाजांनी भेदक मारा करत सुरुवातीलाच न्यूझीलंडच्या डावाला खिंडार पाडले; यात आकिब नबीने टीम सेफर्ट व विल यंगला झटपट बाद केले, अंशुल कंबोजने हेन्री निकोल्सची दांडी गुल केली, तर गुरनूर ब्रारने टॉम लॅथम व ग्लेन फिलिप्सला माघारी धाडत किवींची अवस्था ५ बाद ५३ धावा अशी बिकट केली होती, ज्यानंतर डॅरिल मिचेलच्या ५५ आणि कर्णधार मिचेल सँटनरच्या ३१ धावांच्या जोरावर ५९ धावांची महत्त्वपूर्ण भागीदारी रचली गेली असली, तरी गुरनूर ब्रारने घेतलेले ४ बळी तसेच आकिब नबी, अंशुल कंबोज व अक्षर पटेल यांनी प्रत्येकी घेतलेल्या २-२ विकेट्सच्या जोरावर भारताने न्यूझीलंडचा संपूर्ण डाव ४१ षटकांत अवघ्या १३४ धावांवर गुंडाळला.
हेही वाचा
“मध्यरात्री २ वाजता माझ्या घरावर हल्ला”; अभिषेक बॅनर्जींचा भाजपवर खळबळजनक आरोप, भाजपचे प्रत्युत्तर
भारताची आघाडीची फळी ढेपाळली; अखेर DLS चा मिळाला फायदा
१३५ धावांच्या आव्हानाचा पाठलाग करताना भारताची सुरुवातही अडखळत झाली; कर्णधार शुबमन गिल पहिल्याच चेंडूवर (गोल्डन डक) बाद झाला, तर विराट कोहलीने केवळ ७ धावा केल्या. रोहित शर्माने २३ धावांचे योगदान दिले, मात्र मोठा फटका खेळण्याच्या नादात तो बाद झाला आणि पाठोपाठ अक्षर पटेलही स्वस्तात माघारी परतला. या पडझडीनंतर श्रेयस अय्यर (३०) आणि केएल राहुल यांनी ३९ धावांची सावध भागीदारी रचत डाव सावरण्याचा प्रयत्न केला असला, तरी न्यूझीलंडकडून काईल जेमिसन आणि जेकब डफी यांनी प्रत्येकी ३-३ विकेट्स घेत भारताची अवस्था ७ बाद ११३ अशी नाजूक केली होती. मात्र, मैदानात केएल राहुल उभा असतानाच पुन्हा मुसळधार पाऊस सुरू झाला आणि डकवर्थ लुईस (DLS) नियमानुसार आवश्यक धावसंख्येपेक्षा ४ धावांनी पुढे असल्याने भारताला अखेर विजयी घोषित करण्यात आले.
महाईन्यूज-X वर फॉलो करा : महाईन्यूजला instagram वर फॉलो करा
