महाराष्ट्रातील दुष्काळाच्या पार्श्वभूमीवर राज ठाकरेंचा मोठा निर्णय; यंदा शिवाजी पार्कवरील मनसेचा दीपोत्सव रद्द

मुंबई : महाराष्ट्रातील दुष्काळी परिस्थिती आणि शेतकऱ्यांचे नुकसान लक्षात घेऊन महाराष्ट्र नवनिर्माण सेनेचे अध्यक्ष राज ठाकरे यांनी यंदा मुंबईतील छत्रपती शिवाजी महाराज पार्क मैदानावर दीपोत्सव साजरा न करण्याचा निर्णय घेतला आहे. दरवर्षी आकर्षक रोषणाई आणि फटाक्यांच्या आतषबाजीने साजरा होणारा हा दीपोत्सव यंदा रद्द करण्यात येणार असल्याची घोषणा राज ठाकरे यांनी व्हिडीओच्या माध्यमातून केली.

राज्यातील दुष्काळी परिस्थिती गंभीर असून ग्रामीण भागातील नागरिकांना पाणीटंचाई आणि शेतीच्या नुकसानीचा सामना करावा लागत आहे. अशा परिस्थितीत मोठ्या प्रमाणावर उत्सव साजरा करणे योग्य वाटत नसल्याचे राज ठाकरे यांनी स्पष्ट केले.

दुष्काळामुळे दीपोत्सव रद्द करण्याचा निर्णय

राज ठाकरे म्हणाले की, दरवर्षी शिवाजी पार्कवरील दीपोत्सवाला महाराष्ट्राच्या कानाकोपऱ्यातून नागरिक उपस्थित राहतात. मैदानावर आकर्षक रोषणाई केली जाते आणि फटाक्यांची आतषबाजी पाहण्यासाठी मुंबई, ठाणे तसेच राज्यातील विविध भागांतून लोक येतात. मात्र, यंदा राज्यातील दुष्काळी परिस्थिती पाहता हा उत्सव साजरा न करण्याचा निर्णय मनसेने घेतला आहे.

राज्यातील ग्रामीण भागात पाण्याचा प्रश्न गंभीर बनला आहे. शेतकरी आणि त्यांच्या कुटुंबीयांना अनेक अडचणींचा सामना करावा लागत आहे. अशा वेळी शहरांमध्ये मोठ्या उत्साहात दिवाळी साजरी होताना ग्रामीण भागातील नागरिकांच्या परिस्थितीचाही विचार केला पाहिजे, असे त्यांनी सांगितले.

हेही वाचा –  डॉ. डी. वाय. पाटील टेक्निकल कॅम्पसमध्ये अमली पदार्थविरोधी जनजागृती कार्यक्रम उत्साहात संपन्न

रोषणाई आणि फटाक्यांवर आवर घालण्याचे आवाहन

यंदा काळी दिवाळी साजरी करण्याची गरज नाही; मात्र उत्सवाच्या जल्लोषाला काही प्रमाणात आवर घालणे आवश्यक आहे, असे राज ठाकरे यांनी म्हटले. नागरिकांनी दिवाळीला कंदील लावावेत, फराळ वाटावा आणि परंपरेनुसार सण साजरा करावा. मात्र, मोठ्या प्रमाणावर रोषणाई करणे आणि फटाके फोडणे या गोष्टींवर स्वतःहून मर्यादा घालाव्यात, अशी विनंती त्यांनी केली.

महाराष्ट्रातील नागरिकांवर दुष्काळाचे संकट असताना मोठ्या प्रमाणावर उत्सव साजरा करणे मनाला पटत नसल्याचेही त्यांनी स्पष्ट केले.

पुढील वर्षी पुन्हा जल्लोषात दीपोत्सव साजरा करण्याची आशा

दुष्काळाच्या पार्श्वभूमीवर राज्यातील परिस्थितीबाबत चिंता व्यक्त करताना राज ठाकरे यांनी पुढील वर्षी परिस्थिती सुधारेल, अशी आशा व्यक्त केली. सर्व काही सुरळीत झाल्यास पुढील वर्षी पुन्हा मोठ्या उत्साहात दिवाळी आणि दीपोत्सव साजरा करू, असे ते म्हणाले.

यावेळी राज ठाकरे यांनी महाराष्ट्रातील नागरिकांना स्वतःच्या, पक्षाच्या आणि कुटुंबाच्या वतीने दिवाळीच्या शुभेच्छाही दिल्या.

राज्यातील दुष्काळी परिस्थिती चिंताजनक

दिलेल्या माहितीनुसार, राज्यातील ३५८ पैकी ३०४ तालुक्यांमध्ये दुष्काळ जाहीर करण्यात आला असून, सुमारे १४१.५३ लाख हेक्टर क्षेत्रावरील पिकांचे नुकसान झाल्याचा अंदाज आहे. यामध्ये जिरायती, बागायती आणि फळबागांचा समावेश आहे. या पार्श्वभूमीवर राज ठाकरे यांनी दीपोत्सव रद्द करण्याचा निर्णय घेतला आहे.

महाईन्यूज-X वर फॉलो करा : महाईन्यूजला instagram वर फॉलो करा