रजनीकांत यांच्या ‘जेलर २’चा जगभरात डंका! अवघ्या ६ दिवसांत ५०० कोटींचा टप्पा पार; मोडले अनेक मोठे रेकॉर्ड्स
Jailer 2 Box Office Collection | दाक्षिणात्य सुपरस्टार रजनीकांत यांचा बहुप्रतिक्षित ‘जेलर २’ हा अ‍ॅक्शनपट सध्या बॉक्स ऑफिसवर तुफानी कमाई करत आहे. नेल्सन दिलीपकुमार यांच्या दिग्दर्शनाखाली बनलेल्या या चित्रपटाने केवळ देशातच नव्हे, तर जगभरात पहिल्या आठवड्यातच नवनवे विक्रम प्रस्थापित केले आहेत. प्रदर्शनाच्या अवघ्या ६ दिवसांत चित्रपटाने जगभरात तब्बल ५४१ कोटी रुपयांहून अधिक कमाई करत ५०० कोटींचा टप्पा सहज पार केला आहे.
प्रदर्शनाचा पहिला आठवडा पूर्ण होण्यापूर्वीच ‘जेलर २’ने देशांतर्गत बॉक्स ऑफिसवर ३३७ कोटींहून अधिक ग्रॉस आणि २८७.८० कोटींचे नेट कलेक्शन गाठले आहे. प्रदर्शनाच्या सहाव्या दिवशी (पहिल्या मंगळवारी) दसऱ्याच्या सुट्टीचा चित्रपटाला मोठा फायदा झाला आणि कमाईत ७.६ टक्क्यांची वाढ नोंदवली गेली. या एकाच दिवशी देशभरातील १५,५२९ शोमधून चित्रपटाने ४५.५५ कोटी रुपये कमावले. यात मूळ तमिळ व्हर्जनने ३१.२० कोटी, तेलुगू व्हर्जनने ८.७५ कोटी आणि हिंदी व्हर्जनने ५ कोटी रुपयांचा वाटा उचलला.
हेही वाचा
प्रदर्शनाच्या पहिल्याच दिवशी (गुरुवार) १६,५५९ स्क्रीन्सवरून तब्बल ५९.७० कोटी रुपयांची धमाकेदार कमाई केली होती, जी चित्रपटाची आतापर्यंतची देशांतर्गत एका दिवसातील सर्वोच्च कमाई ठरली. यानंतर शनिवारी ४७.२५ कोटी आणि रविवारी ५५.८५ कोटींची कमाई करत पहिल्या चार दिवसांच्या वीकेंडमध्ये जगभरात तब्बल ४१८.२५ कोटी रुपयांचा गल्ला जमवला. हा तमिळ चित्रपटसृष्टीच्या इतिहासातील आतापर्यंतचा सर्वात मोठा ‘ओपनिंग वीकेंड’ ठरला आहे.
‘जेलर २’ने मोडलेले प्रमुख रेकॉर्ड्स
‘जेलर २’ने बॉक्स ऑफिसवर अनेक ऐतिहासिक विक्रम आपल्या नावावर केले आहेत. जागतिक स्तरावर ५०० कोटींचा टप्पा सर्वात जलद वेगाने पार करणारा तमिळ चित्रपट ठरण्यासोबतच, पहिल्याच दिवशी परदेशात ५७ कोटी रुपयांची कमाई करून यंदा परदेशात सर्वाधिक ओपनिंग करणारा भारतीय चित्रपट असा मानही याने मिळवला आहे. याशिवाय २०२६ मधील आतापर्यंतचा सर्वाधिक गल्ला जमवणारा तमिळ सिनेमा ठरलेल्या या चित्रपटाने, सुपरस्टार रजनीकांत यांच्या ५० वर्षांच्या प्रदीर्घ कारकिर्दीतील सर्वात मोठी ओपनिंग घेणारा आणि त्यांच्या सर्वाधिक कमाई करणाऱ्या सर्वोच्च चित्रपटांच्या यादीत स्थान मिळवणारा चित्रपट असा दुहेरी विक्रमही प्रस्थापित केला आहे.
महाईन्यूज-X वर फॉलो करा : महाईन्यूजला instagram वर फॉलो करा
