महाराष्ट्रात पावसाची चाहूल; अनेक भागांत हलक्या ते मध्यम सरींचा अंदाज

मुंबई : राज्यातील काही भागांत हलका ते मध्यम पाऊस सुरू असला तरी अनेक ठिकाणी पावसाने उघडीप घेतली आहे. त्यामुळे समाधानकारक पावसाच्या प्रतीक्षेत असलेल्या शेतकऱ्यांचे लक्ष हवामानाकडे लागले आहे. २७ ऑगस्ट रोजी महाराष्ट्रातील कोणत्याही जिल्ह्यासाठी पावसाचा विशेष अलर्ट जारी करण्यात आलेला नाही.

कोकणात हलक्या ते मध्यम सरी

पालघर, ठाणे, मुंबई आणि रायगड जिल्ह्यांत मेघगर्जनेसह हलक्या ते मध्यम स्वरूपाच्या पावसाची शक्यता आहे. रत्नागिरी आणि सिंधुदुर्ग जिल्ह्यांत मध्यम पाऊस पडण्याचा अंदाज आहे. मात्र, या भागासाठी कोणताही विशेष हवामान इशारा देण्यात आलेला नाही.

पश्चिम महाराष्ट्रातही उघडीप

पुणे, सातारा आणि सांगली जिल्ह्यांत हलक्या पावसाची शक्यता आहे. पुणे, सातारा आणि कोल्हापूरच्या घाटमाथ्यावर काही ठिकाणी मध्यम स्वरूपाचा पाऊस पडू शकतो. सोलापूरमध्येही हलक्या ते मध्यम सरींची शक्यता वर्तविण्यात आली आहे.

उत्तर महाराष्ट्रात तुरळक पाऊस

धुळे, नंदुरबार, जळगाव, नाशिक आणि अहिल्यानगर जिल्ह्यांत हलक्या पावसाचा अंदाज आहे. नाशिकच्या घाटमाथ्यावर मध्यम पाऊस होण्याची शक्यता असून या विभागासाठीही कोणताही अलर्ट जारी करण्यात आलेला नाही.

हेही वाचा –  हाफकिन कर्मचाऱ्यांच्या प्रलंबित प्रश्नांवर सकारात्मक चर्चा; महामंडळाच्या आधुनिकीकरणालाही गती

मराठवाड्यात मेघगर्जनेसह हलक्या सरी

छत्रपती संभाजीनगर, जालना, परभणी, बीड आणि धाराशिवमध्ये मेघगर्जनेसह हलक्या सरी पडू शकतात. हिंगोली, नांदेड आणि लातूर जिल्ह्यांत हलका ते मध्यम पाऊस होण्याची शक्यता आहे.

विदर्भात प्रामुख्याने उघडीप

अकोला, अमरावती, बुलढाणा, वाशिम, यवतमाळ, नागपूर, वर्धा, भंडारा, गोंदिया, चंद्रपूर आणि गडचिरोली या जिल्ह्यांसाठी २७ ऑगस्ट रोजी कोणताही पावसाचा इशारा जारी करण्यात आलेला नाही. काही ठिकाणी ढगाळ वातावरणासह तुरळक हलक्या सरी पडू शकतात.

थोडक्यात, २७ ऑगस्ट रोजी राज्यात मुसळधार पावसाचा कोणताही अलर्ट नसून कोकण, मध्य महाराष्ट्र आणि मराठवाड्यात काही ठिकाणी हलका ते मध्यम पाऊस पडण्याची शक्यता आहे. विदर्भात मात्र पावसाची उघडीप कायम राहण्याचा अंदाज आहे.

महाईन्यूज-X वर फॉलो करा : महाईन्यूजला instagram वर फॉलो करा