पिंपरी चिंचवड: महाराष्ट्राचे माजी मुख्यमंत्री तथा हरितक्रांतीचे शिल्पकार स्व. वसंतराव नाईक यांच्या जयंतीनिमित्त प्रियदर्शनी स्कूल, मोशी येथे कृषी दिन मोठ्या उत्साहात साजरा करण्यात आला. या कार्यक्रमाचा उद्देश विद्यार्थ्यांमध्ये शेतीचे महत्त्व, शेतकऱ्यांचे राष्ट्रनिर्मितीतील योगदान आणि शाश्वत शेतीबाबत जागरूकता निर्माण करणे हा होता.
हेही वाचा –एकनाथ शिंदे आज दिल्ली गाठणार? ‘या’ दोन खासदारांच्या गळ्यात मंत्रीपदाची माळ पडण्याची शक्यता
या कार्यक्रमासाठी महाराष्ट्र शासनाच्या कृषी विभागाचे सेवानिवृत्त कृषी अधिकारी श्री. परदेशी तसेच यशस्वी प्रगतशील शेतकरी श्री. सत्यवान बटवाल हे प्रमुख पाहुणे म्हणून उपस्थित होते. त्यांनी विद्यार्थ्यांना आधुनिक शेती, नैसर्गिक संसाधनांचे संवर्धन, कृषी क्षेत्रातील नव्या संधी आणि शेतकऱ्यांच्या जीवनातील अनुभव याविषयी प्रेरणादायी मार्गदर्शन केले. शेती ही केवळ व्यवसाय नसून देशाच्या अर्थव्यवस्थेचा कणा असून प्रत्येक नागरिकाने अन्नदात्या शेतकऱ्यांविषयी आदर बाळगला पाहिजे, असा संदेश त्यांनी दिला.
कार्यक्रमात शिक्षकांनी स्व. वसंतराव नाईक यांच्या कृषी क्षेत्रातील योगदानावर प्रकाश टाकला. त्यांच्या कार्यकाळात सुधारित बियाण्यांचा प्रसार, सिंचन सुविधांचा विस्तार, कृषी शिक्षणाला चालना, शेतकऱ्यांसाठी विविध कल्याणकारी योजना तसेच कापूस एकाधिकार खरेदी योजना यांसारख्या उपक्रमांमुळे महाराष्ट्रातील कृषी क्षेत्राला नवी दिशा मिळाली. दुष्काळी भागांच्या विकासासाठी आणि शेतकऱ्यांचे जीवनमान उंचावण्यासाठी त्यांनी केलेले कार्य विद्यार्थ्यांना समजावून सांगण्यात आले.
यावेळी विद्यार्थ्यांनी कृषीविषयक माहितीपर उपक्रम, घोषवाक्य सादरीकरण आणि चर्चासत्रात उत्स्फूर्त सहभाग घेतला. या उपक्रमातून विद्यार्थ्यांमध्ये पर्यावरण संवर्धन, जलसंधारण, शाश्वत शेती आणि अन्नदात्या शेतकऱ्यांप्रती कृतज्ञतेची भावना अधिक दृढ झाली.
कार्यक्रमाच्या शेवटी विद्यार्थ्यांनी “शेतकऱ्यांचा सन्मान करू, पाणी वाचवू, पर्यावरणाचे रक्षण करू आणि शाश्वत शेतीला प्रोत्साहन देऊ” असा संकल्प केला. या उपक्रमामुळे विद्यार्थ्यांना कृषी क्षेत्राचे महत्त्व समजून घेण्यास प्रेरणा मिळाली आणि कृषीविषयक सकारात्मक दृष्टिकोन विकसित झाला.
कार्यक्रमाचे यशस्वी आयोजन प्रियदर्शनी स्कूल, मोशीच्या मुख्याध्यापिका, शिक्षक व कर्मचाऱ्यांच्या सहकार्याने करण्यात आले.
महाईन्यूज-X वर फॉलो करा : महाईन्यूजला instagram वर फॉलो करा
