न्यू इंग्लिश मीडियम स्कूलमध्ये शिवजयंतीचा उत्साह; ढोल-लेझीमच्या गजरात थेरगावमध्ये निघाली भव्य पालखी मिरवणूक
पिंपरी चिंचवड : अखंड हिंदुस्थानाचे आराध्य दैवत, न्यायप्रविष्ट आणि शिस्तप्रिय शासनकर्ते श्रीमंत छत्रपती शिवाजी महाराज यांची जयंती ‘न्यू इंग्लिश मीडियम स्कूल, थेरगाव’ येथे अत्यंत उत्साहात साजरी करण्यात आली. या निमित्ताने आयोजित सांस्कृतिक कार्यक्रम आणि भव्य मिरवणुकीने संपूर्ण थेरगाव परिसर शिवमय झाला होता.
सांस्कृतिक कार्यक्रमातून दिली मानवंदना
कार्यक्रमाची सुरुवात शिवरायांच्या प्रतिमेच्या पूजनाने झाली. यावेळी शाळेतील विद्यार्थ्यांनी पोवाडे, ऐतिहासिक नृत्य आणि ओघवत्या शैलीत भाषणे सादर करून शिवरायांच्या जाज्वल्य इतिहासाला उजाळा दिला. पारंपारिक वेशभूषेतील विद्यार्थ्यांनी आपल्या कलागुणांच्या जोरावर उपस्थितांची मने जिंकली.
हेही वाचा – भोसरीत शिवजयंतीचा उत्सव उत्साहात
भव्य पालखी सोहळा आणि मिरवणूक
शिवजयंतीचे मुख्य आकर्षण ठरली ती म्हणजे शिवरायांच्या मूर्तीची पालखी मिरवणूक. ढोल-ताशांच्या कडकडाटात आणि लेझीमच्या गजरात ही मिरवणूक काढण्यात आली. “जय भवानी, जय शिवाजी” च्या घोषणांनी परिसर दणाणून गेला होता. शिस्तबद्ध पद्धतीने काढण्यात आलेल्या या मिरवणुकीचे थेरगावमधील नागरिकांनी विशेष कौतुक केले.
मान्यवरांची उपस्थिती
या सोहळ्यासाठी संस्थेचे संस्थापक अध्यक्ष श्री. विजय पवार, सचिव अशोक मोरे, खजिनदार सुरेखा पवार, मुख्याध्यापिका विद्या नाईक व नायगम अग्नीस यांच्यासह सर्व शिक्षक आणि शिक्षकेतर कर्मचारी उपस्थित होते.
महाईन्यूज-X वर फॉलो करा : महाईन्यूजला instagram वर फॉलो करा
“छत्रपती शिवाजी महाराजांचे विचार आणि आचार आजच्या पिढीने आत्मसात करणे काळाची गरज आहे. विद्यार्थ्यांनी त्यांच्या शौर्याचा आणि शिस्तीचा आदर्श डोळ्यासमोर ठेवून प्रगती करावी, हाच या सोहळ्याचा मुख्य उद्देश आहे. सर्व विद्यार्थी आणि शिक्षकांनी हा सोहळा यशस्वी करण्यासाठी घेतलेली मेहनत कौतुकास्पद आहे.”
— विजय पवार (संस्थापक अध्यक्ष, न्यू इंग्लिश मीडियम स्कूल, थेरगाव)
