शाळेत खेळताना तिसऱ्या मजल्यावरून पडून विद्यार्थ्यांचा मृत्यू
पिंपरी : पिंपरी चिंचवड महापालिकेच्या शाळेतील इमारतीच्या तिसऱ्या मजल्यावरून पडून एका विद्यार्थ्यांचा मृत्यू झाला असल्याची धक्कादायक माहिती समोर आली आहे. जिन्याच्या रेलिंगवर घसरगुंडी खेळताना ही दुर्दैवी घटना घडली, अशी माहिती प्रत्यक्षदर्शी विद्यार्थ्यांनी पोलिसांना दिली आहे. सार्थक कांबळे असं मृत पावलेल्या विद्यार्थ्यांचे नाव आहे.काळेवाडीत राहणारा सार्थक हा हुतात्मा चाफेकर विद्यामंदिर शाळेत आठवीच्या वर्गात शिकत होता.
हेही वाचा – इंग्लंडचा संघ फलंदाजीला न येताही त्यांना फ्री मिळाल्या ५ धावा; जाणून घ्या नेमके प्रकरण काय?
बाराच्या सुमारास तो तिसऱ्या मजल्याच्या पायऱ्यांवरील लोखंडी रेलिंगवर खेळत होता. पण रेलिंगवर घसरगुंडी खेळणं धोकादायक होतं. याची कल्पना असल्यानं एका मित्राने तू इथं खेळू नकोस, खाली पडशील, तुला लागेल असं म्हणत रेलिंगवरून खाली उतरण्याचा सल्ला दिला. मात्र त्याने तो ऐकला नाही, तो त्याच्याच धुंदीत होता. मात्र अचानकपणे त्याचा तोल गेला अन तो थेट तळ मजल्याच्या डक्टमध्ये पडला. अशी माहिती सार्थकच्या मित्रांनी दिल्याचं पोलिसांनी सांगितलं आहे.
या अपघातात सार्थकला जोराचा मार लागला, तातडीनं त्याला रुग्णालयात हलविण्यात आलं. पण दुर्दैवाने त्याचा मृत्यू झाला आहे. चिंचवड पोलीस याप्रकरणी अधिकचा तपास करत आहेत.